आता राडा तर होणारच... अल्लू अर्जुन आणि अ‍ॅटलीच्या नवीन चित्रपटाची घोषणा

अल्लू अर्जून पुन्हा एकदा रुपेरी पडद्यावर धुमाकूळ घालण्यास सज्ज झाला आहे.

AA22xA6: 'स्टायलिश स्टार' अल्लू अर्जुन (Allu Arjun) हा दाक्षिणात्य चित्रपटसृष्टीतील आघाडीच्या अभिनेत्यांमध्ये गणला जातो. अलिकडेच प्रदर्शित झालेला त्याचा 'पुष्पा २: द रूल' (Pushpa 2: The Rule) हा चित्रपट प्रचंड गाजला. या चित्रपटाने जुने रेकॉर्ड तर मोडलेच पण यासोबतच नवे रेकॉर्ड रचलेत. 'पुष्पा २: द रूल' हा भारतात सर्वात जास्त कमाई करणारा चित्रपट ठरला. आता 'पुष्पा २: द रूल' अल्लू अर्जून कोणत्या भूमिकेत दिसणार याची सर्वांना उत्सुकता आहे.  अल्लू अर्जूनच्या आगामी प्रोजेक्टची माहिती समोर आली आहे. 

अल्लू अर्जून पुन्हा एकदा चित्रपटसृष्टीत आग लावण्यास सज्ज झाला आहे. आज अल्लू अर्जुनचा ४३ वा वाढदिवस आहे.  या खास प्रसंगी, अभिनेत्याने त्याच्या चाहत्यांना एक खास भेट दिली आहे. अल्लू अर्जुनच्या वाढदिवशी त्याच्या नवीन चित्रपटाची घोषणा करण्यात केली आहे.  अभिनेत्याचा हा चित्रपट अ‍ॅटली कुमार (Atlee Kumar) दिग्दर्शित करणार आहे. गेल्या बऱ्याच काळापासून या चित्रपटाची चर्चा सुरू होती. पण, आता निर्मात्यांनी अधिकृत घोषणा केली आहे.

आज ( ८ एप्रिल २०२५) प्रॉडक्शन हाऊस सन पिक्चर्सने X वर व्हिडिओ शेअर करून याबद्दल माहिती दिली. या व्हिडीओच्या कॅप्शनमध्ये लिहलं, "एका ऐतिहासिक सिनेमॅटिक कार्यक्रमासाठी सज्ज व्हा".  व्हिडिओमध्ये अल्लू अर्जुन चेन्नईतील प्रॉडक्शन हाऊसच्या ऑफिसकडे जाताना दिसतो, जिथे तो दिग्दर्शक अ‍ॅटली आणि निर्माते कलानिधी मारन यांना भेटतो. हे तिघेही प्रकल्पावर चर्चा करताना आणि  प्रोजेक्ट अधिकृतपणे लॉक करताना दिसतात. 

Gear up for the Landmark Cinematic Event⚡✨#AA22xA6 - A Magnum Opus from Sun Pictures💥@alluarjun@Atlee_dir#SunPictures#AA22#A6pic.twitter.com/MUD2hVXYDP

— Sun Pictures (@sunpictures) April 8, 2025

यानंतर व्हिडीओमध्ये थेट लॉस एंजेलिसमधील व्हीएफएक्स स्टुडिओला दिलेली भेट दाखवण्यात आली आहे.  यामध्ये अल्लू अर्जून आणि अ‍ॅटली हे हॉलिवूडमधील अनेक प्रसिद्ध तांत्रिक तज्ञांच्या मदतीने पटकथेवर काम करताना दिसून आले. यामध्ये आयर्नहेड स्टुडिओचे सीईओ आणि कला दिग्दर्शक जोस फर्नांडिस यांचा समावेश आहे, जे स्पायडर-मॅन: होमकमिंग, कॅप्टन अमेरिका: सिव्हिल वॉर आणि अ‍ॅव्हेंजर्स: एज ऑफ अल्ट्रॉन या चित्रपटांसाठी ओळखले जातात.

चित्रपटाबद्दल आपला उत्साह व्यक्त करताना अ‍ॅटली म्हणाला, "हा असा चित्रपट आहे जो मी नेहमीच बनवण्याचे स्वप्न पाहत होतो. या स्क्रिप्टला साकारण्यासाठी वर्षानुवर्षे लागली. आता सन पिक्चर्समधील कलानिधी मारन सरांच्या दूरदर्शी नेतृत्वाखाली आयकॉन स्टार अल्लू अर्जुन सर यांच्यासोबत ते प्रत्यक्षात आणणे हे एखादे स्वप्न पूर्ण होण्यापेक्षा कमी नाही. हा चित्रपट मुळातच भव्य आहे आणि त्याची कथा जादुई आहे". चित्रपटाचं नाव समोर आलेलं नाही. पण, सध्या  #AA22xA6 असं तात्पुरते नावं या प्रोजेक्टला देण्यात आलेलं आहे. हा अल्लू अर्जुनचा २२ वा आणि अ‍ॅटलीचा सहावा चित्रपट आहे