ज्युनियर एनटीआरने देशाची शान वाढवली, ऑस्करमधून मिळाला 'हा' मोठा सन्मान

ऑस्कर अ‍ॅकॅडमी ऑफ मोशन फिक्चर आर्ट्स अ‍ॅन्ड सायन्सेसच्या कलाकार यादीत ज्युनिअर एनटीआरचा समावेश झाला आहे

लोकप्रियतेच्या शिखरावर असलेला दाक्षिणात्य अभिनेता ज्युनिअर एनटीआरने देशाचा गौरव वाढवला आहे.  ज्युनिअर एनटीआरच्या चाहत्यांसाठी आनंदाची बातमी आहे. ऑस्कर अ‍ॅकॅडमी ऑफ मोशन फिक्चर आर्ट्स अ‍ॅन्ड सायन्सेसच्या कलाकार यादीत ज्युनिअर एनटीआरचा समावेश झाला आहे. वर्षाच्या सुरुवातीलाच ज्युनिअर एनटीआरच्या 'आरआरआर' या सिनेमाला ऑस्कर मिळालं आहे. त्यानंतर आता ऑस्करच्या कलाकारांच्या यादीत समावेश झाल्याने आंतरराष्ट्रीय स्तरावर ज्युनिअर एनटीआरचं हे दुसरं मोठं यश आहे.

द अ‍ॅकॅडमीने सोशल मीडियावर एक पोस्ट शेअर केली आहे. ज्यात ज्युनिअर एनटीआरसह आणखी अनेक स्टार्सची नावे जाहीर केली आहेत. ज्युनिअर एनटीआरसह ह्यू क्वान, मार्शा स्टेफनी ब्लॅक, केरी कॉन्डन आणि रोजा सलाजार या कलाकारांचाही समावेश आहे. 

अ‍ॅकॅडमीने पोस्ट शेअर करत लिहिलं आहे, 'कथा कल्पनाशक्तीच्या मर्यादेच्या पलीकडे जाऊन जगभरातील प्रेक्षकांना भुरळ घालतात. अपल्या अभिनयातून ते काल्पनिक आणि वास्तविकता यांच्यातील अंतर कमी करतात. ते सादर करत असलेल्या पात्रांचा संघर्ष, आनंद आणि विजयांमध्ये आपण स्वतःला पाहू शकतो. ह्यू क्वान, मार्शा स्टेफनी ब्लॅक, केरी कॉन्डन, रोजा सलाजार आणि ज्युनिअर एनटीआर यांचे अ‍ॅकॅडमीमध्ये स्वागत करताना आम्हाला आनंद होत आहे'

ज्युनिअर एनटीआरचच्या वर्कफ्रंटबद्दल बोलायचे झाल्यास, त्याचा 'देवरा' हा आगामी सिनेमा लवकरच प्रेक्षकांच्या भेटीला येत आहे.  कोराताला शिवा या सिनेमाचं दिग्दर्शन करत आहेत. तर जान्हवी कपूर आणि अनिल कपूर हे कलाकारही या सिनेमात महत्त्वाच्या भूमिकेत झळकणार आहेत. 5 एप्रिलला हा सिनेमा तेलुगू, तामिळ, हिंदी, कन्नड आणि मल्याळम या भाषांमध्ये प्रदर्शित होणार आहे.

शिवाय, ज्युनिअर एनटीआरने 'वॉर 2' या सिनेमाच्या माध्यमातून बॉलिवूडमध्ये पदार्पण केलं. या सिनेमात तो हृतिक रोशनसोबत झळकला. लवकरच या सिनेमाचा तिसरा भाग प्रेक्षकांच्या भेटीला येणार आहे. दाक्षिणात्य सिनेसृष्टीतील लोकप्रिय अभिनेत्यांच्या यादीत ज्युनिअर एनटीआरचा समावेश आहे.