प्रसिद्ध दाक्षिणात्य अभिनेत्याचा अमेरिकेत अपघात, हात फ्रॅक्चर; सुशांतसिंह राजपूतसोबत केलंय काम

34 वर्षीय 'या' अभिनेत्याचा अमेरिकेत अपघात

दाक्षिणात्य अभिनेता नवीन पॉलीशेट्टीचा (Naveen Polishetty) अमेरिकेत अपघात झाल्याची घटना घडली आहे. अभिनेता बाईक चालवत होता तेव्हा अपघात झाला. यामध्ये त्याला गंभीर मार लागला आहे. याविषयी त्याच्या टीमने माहिती दिली आहे. अद्याप त्याच्या सोशल मीडियावरुन कोणतंही अपडेट मिळालेलं नाही. सुदैवाने तो या अपघातातून वाचला आहे.

34 वर्षीय नवीन पॉलीशेट्टीच्या टीमने दिलेल्या माहितीनुसार, अमेरिकेच्या डलास येथील भागात अभिनेता बाईकवरुन जात होता. अचानक बाईक घसरली त्याचं नियंत्रण सुटलं आणि तो पडला. यात त्याच्या हाताला गंभीर दुखापत झाली असून फ्रॅक्चर झाला आहे. सध्या त्याच्यावर उपचार सुरु आहेत. त्याच्या तब्येतीविषयी पुढील अपडेट देण्यात येईल.

नवीन पॉलीशेट्टीने हिंदी सिनेमातही काम केलं आहे. सुशांतसिंह राजपूतचा गाजलेला 'छिछोरे' सिनेमात तो झळकला होता. तर गेल्याच वर्षी त्याचा 'मिस शेट्टी मिस्टर पॉलीशेट्टी' या रोमँटिक कॉमेडी सिनेमातही दिसला. सध्या तो श्रीलीला यांच्यासोबत कल्याण शंकर यांच्या 'अनागानागा ओका राजू' सिनेमाचं शूटिंग करत होता. नवीन अभिनेतासोबतच पटकथा लेखकही आहे.