"माझ्या आयुष्यात आल्याबद्दल..", स्पृहा जोशी झाली भावूक, 'लोकमान्य’ मालिका घेणार प्रेक्षकांचा निरोप

'लोकमान्य' मालिका प्रेक्षकांचा निरोप घेणार म्हणून स्पृहा जोशी भावूक झालीय.

लोकमान्य टिळक यांच्या जीवनावर आधारित 'लोकमान्य' (lokmanya) ही मालिका सध्या चांगलीच लोकप्रिय ठरत ठरली. मात्र आता ही मालिका प्रेक्षकांचा निरोप घेणार आहे. या मालिकेत अभिनेता क्षितीज दाते लोकमान्य टिळकांची भूमिका साकारत आहे. तर, अभिनेत्री स्पृहा जोशी त्यांच्या पत्नीची भूमिका साकारत आहे. ही मालिका प्रेक्षकांचा निरोप घेणार म्हणून स्पृहा जोशी भावूक झाली आहे. सोशल मीडियावर तिने एक पोस्ट शेअर केली आहे. 

लोकमान्य मालिका गेल्या वर्षी डिसेंबर महिन्यात प्रेक्षकांच्या भेटीला आली होती. नुकतेच या मालिकेने १०० भागांचा टप्पा पार केलेला पाहायला मिळाला होता.त्यानंतर या मालिकेने बऱ्याच वर्षांचा लीप घेतलेला दिसून येतो. या लीपमुळे मालिकेत अनेक नवीन पात्रांची एन्ट्री करण्यात आलेली आहे. मात्र आता प्रेक्षकांचा पुरेसा प्रतिसाद मिळत नसल्याचे पाहून ही मालिका आटोपती घेण्यावर भर दिला जात आहे.

स्पृहा ही मालिका बंद होणार म्हणून भावूक झालीय. सोशल मीडियावर तिने सत्यभामाबाईंच्या भूमिकेतील तिचे काही फोटो शेअर केलेत. याबरोबरच तिने टीमसह मालिकेचे आभार मानले आहे.

स्पृहाची पोस्ट 
माझ्या आयुष्यात आल्याबद्दल खूप खूप आभार, भामे.. स्वप्नात स्वप्न.. भासात भास सुवर्ण मृग.. अलगद फास
नाटकात नाटक.. तळ्यात चंद्र वारा झपताल.. सप्तक मंद्र पायी पैंजण.. भवताल कुंपण तुझ्यात मी.. माझ्यात तू ...
अमर्याद एकटेपण.. !!

दशमी क्रिएशन्स निर्माते नितीन वैद्य यांनी मुंटाशी बोलताना याबाबत संताप व्यक्त केला आहे. उत्तम सादरीकरण आणि मालिकेचा दर्जा राखून ठेवला असला तरी आता वाहिनीने मालिका बंद करण्यास सांगितले आहे. त्यामुळे इथून पुढे आता कोणतेही ऐतिहासिक मालिका करायची असेल तर ठराविक भागांपूर्तीच ती मर्यादित ठेवण्यात येईल याचा निर्णय घ्यावा लागेल. तेवढ्या भागांपुरताच वाहिनीशी करार करू असे त्यांनी म्हटले आहे. दरम्यान लोकमान्य मालिका वास्तवाला धरून असावी यावर आम्ही खूप मेहनत घेतली होती. पण पुरेसा प्रतिसाद न मिळाल्यामुळे वेळेअगोदरच मालिकेला निरोप घ्यावा लागत आहे. यामुळे नितीन वैद्य यांनी नाराजी व्यक्त केली आहे.