कदाचित न्यूयॉर्कला अलविदा म्हणण्याची वेळ आली...! भावुक झाली शाहरूखची लेक सुहाना खान

Suhana Khanने पोस्ट टाकली रे टाकली की ती व्हायरल होते. सध्या तिच्या अशाच एका नव्या पोस्टची जोरदार चर्चा आहे.

शाहरूख खान  (Shahrukh Khan) व गौरी खानची  (Gauri Khan) लाडकी लेक सुहाना खान (Suhana Khan) हिच्या प्रत्येक पोस्टवर चाहते लक्ष ठेवून असतात. साहजिकच सुहानाने पोस्ट टाकली रे टाकली की ती व्हायरल होते. सध्या तिच्या अशाच एका नव्या पोस्टची जोरदार चर्चा आहे. सुहाना दीर्घकाळापासून न्यूयॉर्कमध्ये शिकतेय, हे तुम्हाला ठाऊक आहेच. पण आता कदाचित न्यूयॉर्कला अलविदा म्हणण्याची वेळ आली आहे...
होय, सुहानाने तिच्या इन्स्टाग्राम अकाऊंटवर एका चालत्या ट्रकचा ब्लॅक अ‍ॅण्ड व्हाईट फोटो शेअर केलाय. ‘काळजी करू नका... न्यूयॉर्क सोडून गेलात तरी तुम्ही कायम न्यूयॉर्कर म्हणूनच ओळखले जाल..,’असा एक मॅसेज या ट्रकवर लिहिलेला दिसतोय.   सुहानाने कॅप्शन न देताच हा फोटो शेअर केलाय. पण सोबत एक ‘ब्रोकन हार्ट’ इमोजी पोस्ट केलाय. तिच्या या पोस्टवरून कदाचित सुहाना न्यूयॉर्क सोडून मायदेशी परतणार, असा अंदाज बांधला जातोय.

सुहाना न्यूयॉर्क युनिव्हर्सिटीच्या टिश स्कूल ऑफ द आर्ट्समध्ये शिकत होती. सुहानाच्या या पोस्टनंतर तिच्या मित्रांनी तिला शुभेच्छा दिल्या आहेत. गुड लक गर्ल, तू भविष्यात खूप चांगल काम करशील..., अशा आशयाच्या अनेक कमेंट्स तिच्या मित्रांनी केल्या आहेत.
शिक्षण पूर्ण झाल्यानंतर आणि भारतात परतल्यानंतर सुहाना खान बॉलिवूड डेब्यू करणार हे आधीच ठरलं होतं. त्यानुसार, जोया अख्तरच्या ‘आर्चीज’ या नेटफ्लिक्स प्रोजेक्टमधून सुहानाचा डेब्यू होणार, अशी चर्चा जोरात आहे. सुहानाच्या पहिल्या सिनेमात तिच्यासोबत महानायक अमिताभ बच्चन यांचा नातू अगस्त्य नंदा  दिसणार असल्याचं कळतंय. इतकंच नाही तर बोनी कपूर व श्रीदेवीची लेक खुशी कपूर शिवाय सैफ अली खान व अमृता सिंगचा मुलगा इब्राहिम खान हे दोघंही या चित्रपटात झळणार असल्याची चर्चा आहे. 

जोया अख्तरने  नुकतीच तिचा आगामी चित्रपट ‘द आर्चीज’ची घोषणा केली होती. हा चित्रपट आर्ची कॉमिक्सवर आधारित असून नेटफ्लिक्सवर स्ट्रिम होणार आहे. 
जोयाने या चित्रपटाच्या स्टारकास्टचा खुलासा केलेला नाही. पण या चित्रपटात सुहाना खान, अगस्त्य नंदा, खुशी कपूर लीड रोलमध्ये असल्याची चर्चा आहे.