अनुपमाबरोबर संजनाचा 'अंगारो सा' गाण्यावर जबरा डान्स, अनिरुद्धनेही दिली साथ, व्हिडिओ एकदा पाहाच

'अनुपमा' आणि 'आई कुठे काय करते' मालिकेतील काही कलाकारांचा एक व्हिडिओ समोर आला आहे. या व्हिडिओत हे कलाकार अल्लू अर्जुन आणि रश्मिकाच्या 'पुष्पा २'मधील 'अंगारो सा' गाण्यावर थिरकताना दिसत आहेत.

'आई कुठे काय करते' ही छोट्या पडद्यावरील अतिशय लोकप्रिय असलेली मालिका आहे. सुरुवातीपासूनच टीआरपीच्या शर्यतीत असलेल्या या मालिकेने प्रेक्षकांच्या मनातही स्थान मिळवलं. मालिकेतील अरुंधती, अनिरुद्ध, संजना ही पात्रही प्रेक्षकांच्या पसंतीस उतरली. 'आई कुठे काय करते' मालिकेचं यश आणि प्रेक्षकांचं प्रेम पाहून या मालिकेचा हिंदीतही रिमेक करण्यात आला. 'अनुपमा' असं 'आई कुठे काय करते' मालिकेच्या हिंदी रिमेकचं नाव आहे. 'आई कुठे काय करते'प्रमाणेच 'अनुपमा' मालिकेलादेखील प्रेक्षकांचं प्रेम मिळालं.

'अनुपमा' आणि 'आई कुठे काय करते' मालिकेतील काही कलाकारांचा एक व्हिडिओ समोर आला आहे. या व्हिडिओत हे कलाकार अल्लू अर्जुन आणि रश्मिकाच्या पुष्पा २मधील अंगारो सा गाण्यावर थिरकताना दिसत आहेत. या गाण्याच्या फ्युजन व्हर्जनवर संजना, अनिरुद्ध आणि अनुपमा यांनी डान्स केला आहे. 'अंगारो सा' आणि 'एक लाजरान मुखडा' या फ्युजन गाण्यावर रील व्हिडिओ बनवला आहे. या व्हिडिओत सुरुवातीला संजना आणि अनुपमा डान्स करत आहेत. गाण्याच्या हुक स्टेप करताना त्या दिसत आहेत. त्यानंतर अनिरुद्धही शेवटी त्यांच्याबरोबर डान्स करत असल्याचं पाहायला मिळत आहे.  

संजना, अनुपमा आणि अनिरुद्धचा हा व्हिडिओ चाहत्यांच्या पसंतीस उतरला आहे. या व्हिडिओवर चाहत्यांनी लाइक्स आणि कमेंट्सचा पाऊस पाडला आहे. 'आई कुठे काय करते' मालिकेत अभिनेत्री रुपाली भोसले संजना हे पात्र साकारत आहे. तर मिलिंद गवळी अनिरुद्धच्या भूमिकेत आहेत. 'अनुपमा' या मालिकेत अभिनेत्री रुपाली गांगुली मुख्य भूमिका साकारत आहे.