‘आई कुठे काय करते’चं पडद्यामागचं सुंदर जग..., मिलिंद गवळीनं शेअर केला खास Video

Aai kuthe kay karte: होय, ‘आई कुठे काय करते’मध्ये अनिरूद्धची भूमिका साकारणारा अभिनेता मिलिंद गवळीनं या सुंदर जगाचा एक सुंदर व्हिडीओ सोशल मीडियावर शेअर केला आहे.  

‘आई कुठे काय करते’ (Aai kuthe kay karte) ही टेलिव्हिजनच्या गाजलेल्या मालिकांपैकी एक. मालिका सुरू झाली आणि अल्पावधीत लोकप्रिय झाली. इतकी की, आजपर्यंत टॉप 5 यादीतील आपलं स्थान या मालिकेनं सोडलेलं नाही. सध्या या मालिकेत अनेक रंगतदार वळणं येत असल्याचं पाहायला मिळत आहे. ही मालिका जितकी सुंदर आहे, तितकंच या मालिकेचं पडद्यामागचं जगही सुंदर आहे. होय, ‘आई कुठे काय करते’मध्ये अनिरूद्धची भूमिका साकारणारा अभिनेता मिलिंद गवळीनं (Milind Gawali) या सुंदर जगाचा एक सुंदर व्हिडीओ सोशल मीडियावर शेअर केला आहे.  

मिलिंदने शेअर केलेल्या या व्हिडीओत ‘आई कुठे काय करते’चा संपूर्ण सेट दिसतो. सेटवर सकाळपासून पॅकअप होईपर्यंतच्या अनेक घडामोडी पाहायला मिळतात. या व्हिडीओसोबत मिलिंदने एक लांबलचक पोस्ट शेअर केली आहे.

‘ पहाटेपासून तर रात्री पॅकअप होईपर्यंतचा आई कुठे काय करतेच्या सेटवरचा एक अख्खा दिवस... 2019 पासून सुरू झालेल्या मालिकेच्या जगाची एक अनोखी झलक़...आई कुठे काय करतेचे एक सुंदर जग.... मला लहानपणापासून शूटिंग पाहायला आवडतं. मला हे स्वप्नांचं जग आवडतं.  मालिका काल्पनिक कथेवर आधारित असली तरीही मालिकेतील सर्व पात्रं ही घरोघरी नावारूपास आली आहेत. लोकांना आता ही पात्रं आपलीशी वाटू लागली आहेत. अरुंधती, संजना, आप्पा, कांचन, आई, यश, अनघा, विमल, अभिषेक, ईशा, आशुतोष, सुलेखा ताई, अविनाश, नितिन शाह, शेखर, कादर, विशाथा, गौरी, विद्याताई आणि अशी बरीच पात्रं.. शिवाय मी साकारलेलं अनिरूद्ध देशमुख हे पात्र...2019 आधी कदाचित ही नावं कुणी कधीच ऐकली नसतील आणि आता अनिरूद्ध हे नाव माझी ओळख बनलं आहे.आयुष्यभर मी या नावाने ओळखला जाईल....,’ अशा शब्दांत त्याने आपल्या भावना व्यक्त केल्या आहेत.

View this post on Instagram

A post shared by 𝗠𝗮𝗿𝗮𝘁𝗵𝗶 𝗦𝗲𝗿𝗶𝗮𝗹𝘀 𝗧𝗥𝗣𝘀 𝗣𝗮𝗴𝗲 🧿💛 (@marathiserials_official)

रंजक वळण
अरुंधतीचं यश डोळ्यात खुपू लागल्यामुळे संजना वारंवार तिच्या विरुद्ध षडयंत्र रचत आहे. मात्र, आता अरुंधतीविरोधात कारस्थान करणं संजनाला महागात पडलं आहे. सध्या सोशल मीडियावर या मालिकेचा एक व्हिडीओ व्हायरल होत आहे. या व्हिडीओमध्ये संजनाला पोलिस अटक करताना दिसत आहेत.अलिकडेच संजनाने संपूर्ण देशमुख कुटुंबाची प्रॉपर्टी स्वत:च्या नावे करुन घेतली. इतकंच नाही तर राहतं घरदेखील तिने तिच्या नावावर केलं. त्यामुळे अनिरुद्धसह घरातील प्रत्येकालाच जबर धक्का बसला. विशेष म्हणजे संजनाने फ्रॉड करुन देशमुखांचं घर बळकावल्यामुळे अरुंधती तिच्या विरोधात तक्रार दाखल करते. त्यामुळे पोलिस संजनाला अटक करतात, असं वळण सध्या मालिकेत पाहायला मिळतंय.