"अब आयेगा असली मज़ा..."; रितेश देशमुख बिग बॉसचा होस्ट झाल्यानंतर किरण मानेंची पोस्ट

Kiran Mane on Riteish Deshmukh : रितेश देशमुख शोचं सूत्रसंचालन करणार, हे समजल्यावर त्याच्यावर अभिनंदनाचा वर्षाव होतो आहे. दरम्यान आता अभिनेता किरण माने यांनी रितेश देशमुखसाठी सोशल मीडियावर पोस्ट शेअर केली आहे.

छोट्या पडद्यावरील लोकप्रिय आणि वादग्रस्त रिएलिटी शो बिग बॉस मराठीच्या पाचव्या सीझन(Bigg Boss Marathi 5)ची नुकतीच घोषणा करण्यात आली. हा सीझन लवकरच प्रेक्षकांच्या भेटीला येणार आहे. विशेष म्हणजे आधीच्या चार सीझनचं सूत्रसंचालन महेश मांजरेकर यांनी केले होते. मात्र यंदाच्या सीझनचा होस्ट रितेश देशमुख (Riteish Deshmukh) आहे. रितेश देशमुख शोचं सूत्रसंचालन करणार, हे समजल्यावर त्याच्यावर अभिनंदनाचा वर्षाव होतो आहे. दरम्यान आता अभिनेता किरण माने यांनी रितेश देशमुखसाठी सोशल मीडियावर पोस्ट शेअर केली आहे. 

किरण माने सतत वेगवेगळ्या कारणांमुळे चर्चेत येत असतात. ते सोशल मीडियावर सक्रीय असून या माध्यमातून चाहत्यांना अपडेट देत असतो. बिग बॉस मराठी ५चे सूत्रसंचालन रितेश देशमुख करणार हे समजल्यावर किरण माने यांनी सोशल मीडियावर बिग बॉसच्या घरात ते असतानाचा व्हिडीओ शेअर केला आहे. त्यावेळी अभिनेतादेखील आला होता. 

किरण मानेंनी व्हिडीओ शेअर करत लिहिले की, रितेशभाऊ, बिगबाॅस मराठी सीझन फोरमध्ये पहिल्यांदा पाहुणा म्हणून आलास तेव्हा बिगबाॅसनं तुझ्या स्वागताची जबाबदारी माझ्यावर दिलीवती... ती आठवण ! आता तू होस्ट म्हणून येतोयस हे कळल्यावर लै लै लै आनंद वाटला. बिगबाॅस या खेळाची जाण असलेला, बायस्ड नसलेला, बॅलन्स्ड-कंपोज्ड होस्ट बिग बाॅस मराठीला गरजेचा होता. तुझा स्वभाव पहाता, तो तुझ्या रूपानं मिळाला असं वाटतं ! आता खर्‍या अर्थानं चटर-पटर बस झाली... अब आयेगा खेल का असली मज़ा... ऑल द बेस्ट रितेशभाऊ... 

किरण मानेंशिवाय शिव ठाकरे, अपूर्वा नेमळेकर, विकास पाटील, गायत्री दातार, विशाल निकम, मीरा जग्गा, पुष्कर जोग आणि रेशम टिपणीससह आणखी काही कलाकारांनी रितेश देशमुखचे स्वागत आणि अभिनंदन केले आहे.