नव्या मालिकेत नव्या रुपात रसिकांच्या भेटीला येणार हृता दुर्गुळे, अभिनेत्यासोबत रंगणार ऑनस्क्रीन केमिस्ट्री

'मन उडू उडू झालं असं' या मालिकेचं नाव असून ही मालिका ३० ऑगस्ट पासून संध्याकाळी ७.३० वाजता प्रेक्षकांच्या मनोरंजनासाठी सज्ज होणार आहे.

आपल्या सौंदर्याने आणि अभिनय कौशल्याने लोकप्रिय अभिनेत्री हृता दुर्गुळे हिने तमाम प्रेक्षकांच्या मनावर भुरळ पाडली आहे. ऋता दुर्गुळे हा मराठी सिनेसृष्टीतील ग्लॅमरस चेहरा बनला आहे. ती अक्षरशः तरुणांच्या गळ्यातील ताईत बनली आहे. 'फुलपाखरू' नंतर हृताचे चाहते तिच्या नवीन मालिकेची अत्यंत आतुरतेने वाट बघत होते. झी मराठीवर नुकताच एका मालिकेचा प्रोमो रिलीज झाला आणि प्रेक्षक चाहत्यांच्या आनंदाला उधाण आलं.

या मालिकेत अभिनेत्री हृता दुर्गुळे आणि अजिंक्य राऊत प्रेक्षकांच्या भेटीस येणार आहेत.मालिकेचे प्रोमो पाहता मालिका तरुणांना नक्की भावणार अशी शक्यता आहे. त्यात हृताच्या चाहत्यांचे प्रमाणही भूपूर आहे, त्यामुळे तिचे चाहते मालिकेवर भरभरुन प्रेम करतील यात शंका नाही. 

'मन उडू उडू झालं असं' या मालिकेचं नाव असून ही मालिका ३० ऑगस्ट पासून संध्याकाळी ७.३० वाजता प्रेक्षकांच्या मनोरंजनासाठी सज्ज होणार आहे. हृताने या मालिकेचा टिझर आणि प्रोमो शेअर करत चाहत्यांसमोर आपल्या भावना व्यक्त करताना 'कमिंग बॅक होम वाली फिलिंग' असं म्हंटल आहे. पुन्हा एकदा छोट्या पडद्यावर मालिका करताना हृताचा आनंद गगनात मावेनासा झाला आहे. 'दुर्वा' आणि 'फुलपाखरु' या मालिकेतल्या हृताने रसिकांची मनं जिंकली होती. त्यानंतर ती 'सिंगिंग स्टार' शोमध्ये सूत्रसंचालिकेच्या भूमिकेत रसिकांना पाहायला मिळाली होती.

मालिकेत अजिंक्य राऊनेही यापूर्वी विठुमाऊली मालिकेत तो झळकला होता. मालिकेत त्याने विठ्ठलाची भूमिका साकारली होती.या मालिकेतल्या अजिंक्यच्या भूमिकेलाही रसिकांची भरभरुन पसंती मिळाली होती. हृताप्रमाणे अजिंक्यचाही मोठा चाहता वर्ग आहे. पहिल्यांदाच हृता आणि अजिंक्य एकत्र झळकणार असून या मालिकेच्या निमित्ताने फ्रेश जोडी रसिकांच्या भेटीला येणार आहे. 

 प्रोमो पाहून प्रेक्षकांची मालिकेबद्दलची उत्सुकता शिगेला पोहोचली आहे. हृता या मालिकेत एक वेगळ्या लुकमध्ये दिसतेय. तिचा प्रोमोमधील लुक पाहून फक्त मालिकेतला नायकच नाही तर तमाम महाराष्ट्राचं घायाळ झाला आहे यात शंकाच नाही.