मराठी चित्रपटसृष्टीतील ही अभिनेत्री लवकरच अडकणार लग्नबेडीत

दख्खनचा राजा ज्योतिबा या मालिकेत चोपडाईची भूमिका साकारणाऱ्या अभिनेत्रीचा नुकताच साखरपुडा पार पडला

महेश कोठारे निर्मित दख्खनचा राजा ज्योतिबा या मालिकेत चोपडाईची भूमिका साकारणाऱ्या अभिनेत्रीचा नुकताच साखरपुडा पार पडला. चोपडाईची भूमिका अभिनेत्री सई कल्याणकर हिने बजावली होती. या मालिके व्यतिरिक्त सईने बऱ्याच मालिकांत आणि चित्रपटात देखील काम केले आहे. अभिनेता अंकुश चौधरीसोबत ती झक्कास या चित्रपटात झळकली होती. सई कल्याणकर ही एक उत्कृष्ट नृत्यांगना असून भरतनाट्यम विशारद प्राप्त केली आहे. स्टार प्रवाहवरील तुझे नि माझे घर श्रीमंताचं या मालिकेतून तिने महत्वाची भूमिका बजावली होती.

काही दिवसांपूर्वी सईने प्रशांत शिवराम चव्हाण यांच्यासोबत सोशल मीडियावर साखरपुडा झाल्याचे सांगून साखरपुड्याचे फोटो चाहत्यांसोबत शेअर केले होते. त्यावरून तिच्या चाहत्यांनी सोशल मीडियावर शुभेच्छा पाठवल्या होत्या. सईचा होणारा नवरा प्रशांत चव्हाण हा पेशाने डॉक्टर आहे. डॉ प्रशांत चव्हाण यांनी नॅनो केमिस्ट्री विषयातून पीएचडी केली आहे. अभिनेत्री सई कल्याणकर आणि डॉ प्रशांत चव्हाण यांचे हे अरेंज मॅरेज असणार आहे. साखरपुड्याच्या सोहळ्यात त्यांनी मोजक्याच मित्रमंडळींना आमंत्रित केले होते. त्याच अनुषंगाने सई आणि प्रशांतचे लग्न अशाच स्वरूपात करणार असल्याचे सांगितले जाते. सईने अद्याप लग्नाची तारीख जाहीर केली नसली तरी येत्या काही दिवसातच ते दोघे लग्नगाठ बांधणार असल्याचे दिसून येतेय.

अभिनेत्री सई कल्याणकर झी युवा वरील फ्रेशर्स या मालिकेत झळकली होती. याच बरोबर कलर्स मराठीवर गणपती बाप्पा मोरया या अध्यात्मिक मालिकेतून तिने सिद्धीची व्यक्तिरेखा साकारली होती. भेटी लागी जिवा या लोकप्रिय मालिकेतून देखील सईने महत्वाची भूमिका निभावली होती. आपल्या सहज सुंदर अभिनयामुळे तिला एका मागून एक मालिका मिळत गेल्या. विशेष म्हणजे हे सगळे चालू असताना देखील अथर्व थिएटरच्या आम्ही पाचपुते नाटकात देखील ती झळकली. मालिका, चित्रपट आणि नाटक अशा तिन्ही माध्यमात सईने आपला जम बसवलेला पाहायला मिळतो.