अमिताभ बच्चन यांचं गिफ्ट राजू श्रीवास्तव यांच्यासाठी ठरणार रामबाण औषध?, जाणून घ्या नेमकं काय आहे 'ते'

Raju Srivastava: प्रसिद्ध कॉमेडियन राजू श्रीवास्तव गेल्या तीन दिवसांपासून रुग्णालयात दाखल आहेत. जगभरातील चाहते त्यांच्यासाठी प्रार्थना करत आहेत.

प्रसिद्ध कॉमेडियन आणि अभिनेता राजू श्रीवास्तव (Raju Srivastava) गेल्या तीन दिवसांपासून रुग्णालयात दाखल आहेत. त्यांना हृदय विकाराचा झटका आल्यामुळे रुग्णालयात दाखल करण्यात आले होते. त्यांच्यावर उपचार सुरु आहेत. जगभरातून त्यांचे चाहते त्यांच्यासाठी प्रार्थना करताना दिसत आहेत. दरम्यान आता बॉलिवूडचे सुपरस्टार अमिताभ बच्चन (Amitabh Bachchan) यांनी राजू यांच्यासाठी एक खास काम केले आहे. 

१० ऑगस्टला जीममध्ये ट्रेड मिलवर धावत असताना हृदयविकाराचा झटका आल्यानंतर राजू श्रीवास्तव बेशुद्ध झाले. त्यांना रुग्णालयात दाखल करण्यात आले. त्यानंतर त्यांची एन्जिओग्राफी करण्यात आली मात्र एन्जिओग्राफी नंतरही ते बेशुद्धच असल्याची माहिती समोर आली होती. मिळालेल्या माहितीनुसार एन्जिओग्राफिमध्ये एका ठिकाणी १०० टक्के ब्लॉक सापडल्याचे सांगण्यात आले होते. तेव्हा पासून त्यांची प्रकृती चिंताजनक होती. मीडिया रिपोर्ट्सनुसार, राजू श्रीवास्तव यांच्या तब्येतीत थोडी सुधारणा होते आहे. राजू श्रीवास्तव यांना दिल्या जाणाऱ्या उपचाराला ते सकारात्मक प्रतिसाद देतायेत. मात्र ते अजूनही व्हेंटिलेटरवर असून ब्रेन रिस्पॉन्ड देत नाही. राजू श्रीवास्तव यांच्या मेंदूवरील उपचारांचा कोणताही परिणाम होत नाही. दरम्यान राजू यांच्या निधनाच्या अफवादेखील पसरल्या होत्या. मात्र काल त्यांच्या कुटुंबाने या निव्वळ अफवा असल्याचे सांगत त्यांची प्रकृती स्थिर असल्याचे सांगितले आहे.

दरम्यान, आता ज्येष्ठ अभिनेते अमिताभ बच्चन यांनी राजू श्रीवास्तव यांच्यासाठी काहीतरी खास केले आहे. मीडिया रिपोर्टनुसार, अमिताभ बच्चन राजूची हेल्थ अपडेट जाणून घेण्याचा सातत्याने प्रयत्न करत होते. मात्र त्यांचा फोन बंद असल्यामुळे बिग बींचा त्यांच्या कुटुंबियांशी संपर्क होऊ शकला नाही. दरम्यान राजू यांच्या कुटुंबातील एका सदस्याने अमिताभ यांच्या कार्यालयात फोन करुन त्यांच्या प्रकृतीची माहिती दिली. त्यावेळी अमिताभ बच्चन यांच्या कर्मचाऱ्यांनी त्यांना सांगितले की बिग बींनी राजू यांच्या मोबाईलवर अनेक मेसेजेस पाठवले आहेत. त्यांनतर त्यांच्या कुटुंबीयांनी राजूचा फोन चालू केला. आणि त्यांनी पाहिले की बिग बींनी जवळपास १० मेसेज केले होते. यामध्ये त्यांनी लिहलं होतं, 'खूप झालं.. आता उठ राजू, तुला अजून खूप काम करायचंय'. कुटुंबीयांनी हे मेसेज पाहून बिग बींना फोन करत त्यांचे आभार मानले. सोबतच त्यांना एक विनंती केली. त्यांनी म्हटलं की, जे मेसेज तुम्ही टाईप केले आहेत. ते कृपा करुन तुमच्या आवाजात पाठवाल का? यावर अमिताभ यांनी क्षणाचाही विलंब न करता आपल्या आवाजात एक मेसेज रेकॉर्ड करुन तो राजू यांच्या कुटुंबियांना पाठवला.

याबाबत कुटुंबीयांनी सांगितले की, मेसेजमुळे चमत्कार झाला असे नाही. पण हा मेसेज ऐकून अमिताभ बच्चन यांचा मोठा चाहता असणाऱ्या राजू यांना नक्कीच बरे वाटले असणार आहे आणि त्यामुळे त्याला लवकर ठीक होण्यास मदतही होऊ शकते'.