"आता काढलं मराठी मुलगी कार्ड" अंकिताने Video शेअर मातृभाषेत मागितले वोट; नेटकरी चिडले

अंकिताने मराठीत वोट मागून लोकांना साद घातली आहे.

'पवित्र रिश्ता' मालिकेतून घराघरात झळकलेली अभिनेत्री अंकिता लोखंडे (Ankita Lokhande) बिग बॉस १७(Bigg Boss 17) मध्ये आता शेवटच्या टप्प्यावर येऊन पोहोचली आहे. अंकिता पती विकी जैनसोबत बिग बॉसमध्ये सहभागी झाली होती. आधी सर्वात स्ट्राँग स्पर्धक असलेली अंकिता नंतर मात्र विकी सोबतच्या भांडणांमुळे चर्चेत आली. अनेकांनी अंकिताचा पाठिंबा काढून घेतला. सुशांतचं नाव घेत ती सहानुभूती मिळवत असल्याचंही चर्चा झाली. आता अंकिताने मराठीत वोट मागून लोकांना साद घातली आहे. तिच्या या व्हिडिओवर प्रेक्षकांनी मात्र तिला शिव्याच घातल्या आहेत. 

मराठीमध्ये व्हिडिओ शेअर करत अंकिता म्हणाली,"तुम्हाला सर्वांना माहितच आहे की मी बिग बॉसमध्ये स्पर्धक म्हणून सहभागी आहे. मला विश्वास आहे की तुम्हाला सगळ्यांना मला बघायला सुद्धा खूप मजा येत असेल. मला तुमचं प्रेम तर मिळतंय पण आता वोट थोडे कमी पडत आहेत. त्यामुळे प्लीज सगळ्यांनी मिळून मला वोट करा. मला माहितीये मी तुमची लाडकी आहे पण तुमचं प्रेम मला आता वोटमधून कळू दे.प्लीज मला खूप वोट करा. मला बिग बॉसची ट्रॉफी घरी आणायची आहे. त्याकरिता मला तुमची साथ हवी आहे. मला वोट करुन बिग बॉस १७ ची विजेती बनवा. थँक यू."

अंकिताच्या या व्हिडिओवर प्रेक्षक मात्र नाराज आहेत. नेटकऱ्यांनी तर या व्हिडिओवर तिखट शब्दात प्रतिक्रिया दिली आहे. 'अंकिताला बाहेर काढा','आता हिने मराठी मुलगी कार्ड काढलं आहे','स्वत: चुकीची असून कॅमेऱ्यासमोर आपल्या पतीला चुकीची दाखवते आगाऊ' अशा शब्दात तिच्या व्हिडिओवर कमेंट आल्या आहेत. यामुळे अंकिताचं विजेतेपद नक्कीच धोक्यात आहे. या सगळ्यात मराठी अभिनेत्री अभिज्ञा भावेने मात्र अंकिताला कमेंट करत पाठिंबा दिला आहे.