लेक असावा तर असा! आलिशान कार घेत धनंजयने पूर्ण केली वडिलांची इच्छा, म्हणाला- "दीड वर्षांपूर्वी बाबांनी..."

'बिग बॉस मराठी' फेम धनंजय पोवारने घेतली आलिशान कार, म्हणतो- "वडिलांची इच्छा होती की..."

'बिग बॉस मराठी'च्या यंदाच्या पर्वात डीपी दादा म्हणून प्रसिद्ध असलेल्या धनंजय पोवारने सहभागी होत सगळ्यांची मनं जिंकून घेतली.  कोल्हापूरच्या या पठ्ठ्याने त्याच्या खेळीने टॉप ५ सदस्यांमध्ये स्थान मिळवलं होतं. धनंजयचा चाहता वर्ग प्रचंड मोठा आहे. इन्स्टाग्रामवर आई आणि पत्नीसह मजेशीर रील बनवणाऱ्या धनंजयला चाहत्यांचा फूल सपोर्टही मिळतो. आता धनंजयने नवी कोरी कार खरेदी केली आहे. चाहत्यांबरोबर ही बातमी शेअर करत त्याने गाडी घेण्यामागचं खरं कारणही सांगितलं आहे. 

धनंजयने महिंद्रा कंपनीची XUV ही गाडी खरेदी केली आहे. धनंजयने त्याच्या वडिलांची इच्छा पूर्ण करण्यासाठी ही गाडी खरेदी केल्याचं म्हटलं आहे. आपल्या नातवंडांनी सनरुफमधून बाहेर यावं, अशी इच्छा त्याच्या वडिलांनी व्यक्त केली होती. त्यामुळे जुनी गाडी विकून धनंजयने ही नवीन गाडी खरेदी केली. नवीन गाडी घेतल्यानंतर धनंजयने व्हिडिओ शेअर करत त्याची झलकही दाखवली. हा व्हिडिओ शेअर करत तो म्हणतो, "असं लढायचं असं करायचं की लोकांनी आपलं साम्राज्य बघायचं. दीड वर्षांपूर्वी वडिलांनी स्वप्न बघितलं होतं. त्यांच्या नातवंडांनी गाडीच्या सनरुफमधून बाहेर यायला पाहिजे. आणि आज या सनरुफमधून माझी मुलं बाहेर आली. त्यांची नातवंडं बाहेर आली". 

"माझ्या आईवडिलांच्या चेहऱ्यावरचं स्मितहास्य बघा. गाडी घेण्याचं कारण एकच...वडिलांना हेच हवं होतं की त्यांच्या नातवंडांनी या सनरुफमधून बाहेर यावं. फक्त या गोष्टीसाठी मी गाडी घेतली. माझ्याकडे गाडी होती. ती विकली आणि नवीन घेतली. याचं कारण म्हणजे माझे वडील आणि वडिलांची तीव्र इच्छा. आयुष्यात आनंद पैशात नाहीये. तर आयुष्यात आनंद आपल्या घरातल्यांच्या सगळ्यांच्या इच्छा पूर्ण करा. त्यातच आनंद आहे. सनरुफमधून बाहेर आल्यानंतर चिमुकल्यांच्या चेहऱ्यावर जे हास्य येतं, त्यात खरा आनंद आहे. गाडी घेण्याचं कारण हेच आहे", असं म्हणत धनंजयने त्याच्या गाडीची झलक दाखवली आहे.