"एवढासा असून पण नाटकी करतोय", संतापलेला सूरज वैभवच्या अंगावर धावून गेला अन्...; घरातच गुलीगत फाईट

Bigg Boss Marathi Season 5 Contestants : वैभवबरोबर सूरजची गुलीगत फाईट, पारा चढला अन् वातावरण तापलं!

Bigg Boss Marathi Season 5 : बिग बॉस मराठी ५ चा दुसरा आठवडा सुरू झाला आहे. या दुसऱ्या आठवड्यात बिग बॉसच्या घरातील पहिलं कॅप्टन्सी कार्य पार पडणार आहे. घरातील सदस्यांमध्ये यंदाच्या सीझनचा पहिला कॅप्टन होण्यासाठी चढाओढ होणार असल्याचं पाहायला मिळणार आहे. यंदाच्या सीझनमधील पहिल्या कॅप्टन्सी कार्यासाठी बुलेट ट्रेनचा टास्क होणार आहे. यामध्ये घराचा कॅप्टन होण्यासाठी टीम A आणि टीम B मधील सदस्यांमध्ये स्पर्धा रंगल्याचं पाहायला मिळणार आहे.

या टास्कदरम्यानचा एक प्रोमो व्हिडिओ समोर आला आहे. या व्हिडिओत बुलेट ट्रेन टास्कदरम्यान सूरज चव्हाण आणि  वैभव नाईक यांच्यामध्ये जोरदार फाइट झाल्याचं पाहायला मिळत आहे. कॅप्टन्सीच्या टास्कदरम्यान सूरजचा पाराही चढल्याचं पाहायला मिळत आहे. वैभवबरोबर त्याची बाचाबाची झाल्याचं दिसत आहे. "बुक्कीत टेंगूळ नाही, मी तोडतो डायरेक्ट. तू फक्त हात लावून दाखव", असं वैभव सूरजला म्हणत आहे. त्यावर सूरज त्याला म्हणतो- "हात लावल्यावर काय करशील?". त्यानंतर वैभवचा पारा आणखीनच चढतो. "दम असेल तर लावून दाखव"असं तो सूरजला म्हणतो. यानंतर मात्र सूरज आणि वैभवमध्ये कडाक्याचं भांडण झाल्याचं दिसत आहे. 

सूरज आणि वैभव हमरीतुमरीवर आल्याचंही व्हिडिओत दिसत आहे. "मस्ती आलीये का?" असं वैभव म्हणताच सूरजही त्याला "तुला पण मस्ती आलीये का?" असं म्हणत प्रत्युत्तर देतो. यावेळी इरिना सूरजला थांबवण्याचा प्रयत्न करत असल्याचं पाहायला मिळत आहे. "दम आहे का तुझ्यात" असं वैभव म्हणतो. त्यावर सूरज त्याला म्हणतो की "दम बघायचाय का तुला माझा?". "एवढासा असून पण नाटकी करतोय", असं पुन्हा वैभव त्याला म्हणतो. त्यानंतर दोघांमध्ये बाचाबाची झाल्याचं व्हिडिओत दिसत आहे. 

बिग बॉसमध्ये भाऊच्या धक्क्यावर घरातील सदस्यांमध्ये दोन गट पाडण्यात आले होते. या दोन्ही टीममधील सदस्यांना बहुमताने निर्णय घेत त्यांच्या टीममधील तीन सदस्यांना कॅप्टन्सीच्या शर्यतीतून बाद करायचं होतं. त्यामुळे या आठवड्याच्या कॅप्टन्सी कार्यातून योगिता चव्हाण, धनंजय पोवार, निखिल दामले, वर्षा उसगावकर, सूरज चव्हाण हे सदस्य बाद झाले आहेत.