VIDEO: 'पावन' योगायोग! पुणे विमानतळावर 'पावनखिंड' सिनेमा सुरू होता अन् पोहोचले 'बाजीप्रभू'

मराठी सिनेसृष्टीत 'पावनखिंड' सिनेमानं प्रेक्षकांच्या मनावर एक वेगळीच छाप पाडली. चित्रपटाला प्रचंड प्रतिसाद मिळाला. ऐतिहासिक चित्रपट म्हटलं की मराठी प्रेक्षकांच्या जिव्हाळ्याचा विषय असतो. वीर बाजीप्रभू देशपांडे यांच्या जीवनावर आधारित 'पावनखिंड' सिनेमावरही प्रेक्षकांनी खूप प्रेम केलं. चित्रपटात अभिनेते अजय पुरकर (Ajay Purkar) यांनी बाजीप्रभु देशपांडे यांची भूमिका साकारली आणि प्रेक्षकांनीही त्यांच्या अभिनयाचं कौतुक केलं. 

'पावनखिंड' सिनेमाची जादू अजूनही कायम आहे. त्यात पुणे विमानतळावर एक 'पावन' योगायोग घडला. त्याचं झालं असं की अभिनेते अजय पुरकर दिग्दर्शक दिग्पाल लांजेकर, अभिनेत्री मृणाल कुलकर्मी यांच्यासोबत पुणे विमानतळावर पोहोचले. एका चित्रपटाच्या चित्रीकरणाला रवाना होण्यासाठी अजय, दिग्पाल आणि मृणाल पुणे विमानतळावर आले होते. त्याचवेळी नेमका विमानतळावरील टेलिव्हिजनवर 'पावनखिंड' सिनेमा लागला होता. 

विमान प्रवासाआधी वेटिंग लॉबीमध्ये प्रवाशांच्या मनोरंजन आणि विरंगुळ्यासाठी काही टेलिव्हिजन्स लावण्यात आले आहेत. याच टेलिव्हिजनवर पावनखिंड सिनेमा सुरू होता आणि त्याचवेळी बाजीप्रभू देशपांडे विमानतळावर प्रगटलेलं पाहून विमानतळावरील मंडळी देखील भारावून गेली. अभिनेते अजय पुरकर यांनी याचा एक व्हिडिओ इन्स्टाग्रामवर शेअर करत "योगायोग..'पावनखिंड' चित्रपट टीव्हीवर सुरू होता आणि आम्ही पुणे विमानतळावर पोहोचलो. प्रत्यक्ष बाजीप्रभु देशपांडे यांना समोर पाहिल्यानंतर विमानतळावर एकच गोंधळ उडाला. ती मजाच काही और", असं कॅप्शन दिलं आहे.