Bigg Boss Marathi 4: कोण होस्ट करणार ‘बिग बॉस मराठी’चा चौथा सीझन, ‘या’ अभिनेत्याच्या नावाची होतेय चर्चा!!

Bigg Boss Marathi 4: आतापर्यंत बिग बॉस मराठीची धुरा महेश मांजरेकर सांभाळत होते. पण चौथा सीझन ते होस्ट करणार नाहीत, असं म्हटलं जात आहे. महेश मांजरेकर हा सीझन होस्ट करणार नसतील तर नवा सीझन कोण होस्ट करणार?  हे जाणून घेण्यासही चाहते उत्सुक आहे.

‘बिग बॉस मराठी’चा चौथा सीझन (Bigg Boss Marathi 4) लवकरच प्रेक्षकांच्या भेटीला येणार आहे. नुकताच या शोचा टीझर प्रदर्शित करण्यात आला आणि चाहत्यांची उत्कंठा शिगेला पोहोचली. सध्या या शोबद्दलच्या एक ना अनेक चर्चा कानावर येत आहेत. त्यापैकीचं एक चर्चा म्हणजे, बिग बॉस मराठीचा चौथा सीझन महेश मांजरेकर होस्ट करणार नसल्याची चर्चा आहे. आतापर्यंत बिग बॉस मराठीची धुरा महेश मांजरेकर सांभाळत होते. पण चौथा सीझन ते होस्ट करणार नाहीत, असं म्हटलं जात आहे. साहजिकच चाहत्यांची काहीशी निराशा झाली आहे. पण महेश मांजरेकर हा सीझन होस्ट करणार नसतील तर नवा सीझन कोण होस्ट करणार?  हे जाणून घेण्यासही चाहते उत्सुक आहे. तूर्तास एका नावाची चर्चा जोरात आहे.

होय, एक दिग्गज मराठमोळा अभिनेता बिग बॉस मराठीचं चौथं सीझन होस्ट करणार असल्याचं कळतंय. हा अभिनेता कोण तर आपला सिद्धू. होय, अभिनेता सिद्धार्थ जाधव (Siddharth Jadhav ) हा सीझन होस्ट करणार असल्याची शक्यता आहे.
  
मराठमोळा अभिनेता सिद्धार्थ जाधव  मराठीतील एक आघाडीचा लोकप्रिय अभिनेता आहे.  मराठी चित्रपटसृष्टी बरोबरच हिंदी चित्रपटांमध्ये ठसा उमटवणारा सिद्धार्थ जाधव आता एका नव्याकोऱ्या भूमिकेत दिसण्याची शक्यता आहे. अर्थात अद्याप सिद्धार्थ वा कलर्स मराठीने याबद्दलची कुठलीही अधिकृत माहिती दिलेली नाही.  

‘बिग बॉस मराठी’ हा छोट्या पडद्यावरील एक वादग्रस्त तेवढाच लोकप्रिय रिअ‍ॅलिटी शो आहे. या शोचे तिन्ही सीझन्स चांगलेच गाजले  होते. बिग बॉसच्या स्पर्धकांमधील राडे, नवनवीन टास्क, मैत्री यामुळे हा शो कायमच लोकप्रिय म्हणून ओळखला जातो. बिग बॉसचे तीनही पर्व हिट ठरल्यानंतर आता लवकरच चौथे पर्व प्रेक्षकांच्या भेटीला येणार आहे. या पर्वात कोण सहभागी होणार याची प्रेक्षकांना उत्सुकता आहे.

अभिनेता सिद्धार्थ जाधव लवकरच ‘दे धक्का 2’ या मराठी चित्रपटाद्वारे प्रेक्षकांच्या भेटीला येणार आहे. तसेच तो रोहित शेट्टीच्या ‘सर्कस’ या हिंदी चित्रपटात देखील महत्वाच्या भूमिकेत दिसणार आहे.