कॉमेडी किंग ओंकार भोजनेच्या नव्या लूकची होतेय चर्चा

Onkar Bhojane : ओंकार भोजने पुन्हा एकदा सोशल मीडियावर चर्चेत आला आहे.

छोट्या पडद्यावरील लोकप्रिय कॉमेडी शो महाराष्ट्राची हास्यजत्रामधून प्रसिद्धीझोतात आलेला अभिनेता ओंकार भोजने(Onkar Bhojane)ने काही महिन्यांपूर्वी ओंकारने फू बाई फू या कार्यक्रमासाठी महाराष्ट्राची हास्यजत्राला रामराम केला होता. त्यामुळे त्याचे चाहते नाराज झाले होते. मात्र आता तो छोट्या पडद्यानंतर रुपेरी पडदा गाजवण्यासाठी सज्ज झाला आहे. ओंकार भोजने लवकरच एका मराठी चित्रपटात झळकणार आहे. या चित्रपटाचे नाव आहे सरला एक कोटी. या चित्रपटाचे पोस्टर नुकतंच समोर आले आहे. यातील ओंकारच्या लूकने प्रेक्षकांचे लक्ष वेधून घेतले आहे.

ओंकार भोजनेने शेअर केलेल्या चित्रपटाच्या पोस्टरमध्ये तो जुगार खेळताना दिसत आहे. तसेच त्याच्या समोर दारुची बाटली, दारुने भरलेला ग्लास आणि सिगारेट पाहायला मिळत आहे. या पोस्टरवर चित्रपटाचे नाव लिहिण्यात आले आहे. त्याखाली सत्य घटनांवरुन प्रेरित असे लिहिले आहे. याबरोबर या पोस्टरवर जो नशिबालाही डावावर लावतो तोच खरा गॅम्बलर असेही लिहिण्यात आले आहे. यात ओंकार एका वेगळ्याच लूकमध्ये दिसत आहे. या चित्रपटाबद्दल आणि ओंकारच्या भूमिकेबद्दल जाणून घेण्यासाठी चाहते उत्सुक आहेत.

सानवी प्रॉडक्शन हाऊस प्रस्तुत आणि आरती चव्हाण यांची निर्मित सरला एक कोटीची कथा, पटकथा आणि दिग्दर्शन अनेक पुरस्कारप्राप्त चित्रपट ‘आटपाडी नाईट्स’चे नितीन सिंधुविजय सुपेकर  यांनी केले आहे. तर विनोद नाईक कार्यकारी निर्माते आहेत. हा चित्रपट लवकरच भेटीला येणार आहे.