​संकट मोचन महाबली हनुमान फेम इशांत भानुशाली झळकणार कुंवारा है पर हमारा है या मालिकेत

स�

��कट मोचन महाबली हनुमान या मालिकेत इशांत भानुशालीने बालहनुमानाची भूमिका साकारली होती. या मालिकेतील नटखट हनुमान सगळ्यांना खूप आवडला होता. पण या मालिकेने लीप घेतल्यावर इशांतने प्रेक्षकांचा निरोप घेतला. त्यानंतर तो दिल देके देखो या मालिकेत झळकला होता. या मालिकेत त्याने बंटी ही भूमिका साकारली होती. तो या मालिकेत तुलसी चोप्राचा म्हणजेच नवनीत निशानचा नातू दाखवला गेला होता. तसेच पेशवा बाजीराव या मालिकेत इशांत विशेष या भूमिकेत दिसला होता. इतिहासात अनेक ठिकाणी नमूद केल्याप्रमाणे बाजीराव यांना स्वराज्याचा अर्थ आणि महत्त्व समजून देण्यात विशेषचा खूप मोठा हात होता. प्रेक्षकांना इशांतच्या या सगळ्याच भूमिका प्रचंड भावल्या होत्या. आता प्रेक्षकांना इशांत एका वेगळ्या भूमिकेत पाहायला मिळणार आहे. कुंवारा है पर हमारा है या मालिकेत इशांत एका वेगळ्या भूमिकेत दिसणार आहे. 
इशांत भानुशालीने आजवर कधीच कॉमेडी भूमिका साकारलेल्या नाहीये. त्यामुळे लोकांना खळखळून हसवण्यासाठी तो खूप उत्सुक आहे. कुंवारा है पर हमारा है ही एक कॉमेडी मालिका असून या मालिकेत तो मिकीची भूमिका साकारणार आहे. या मालिकेविषयी आणि या मालिकेतील त्याच्या भूमिकेविषयी इशांत सांगतो, मी आजवर ऐतिहासिक, पौराणिक मालिकांमध्ये काम केले आहे. पण कधीच कोणती कॉमेडी भूमिका साकारली नव्हती. त्यामुळे या मालिकेत प्रेक्षकांना एक वेगळा इशांत पाहायला मिळणार आहे. या मालिकेचे चित्रीकरण सुरू व्हायची मी आतुरतेने वाट पाहात आहे. मी आजवर साकारलेल्या सगळ्या भूमिकांपेक्षा मिकी ही भूमिका खूपच वेगळी आहे. प्रेक्षकांनी आजवर माझ्या भूमिकांवर जितके प्रेम केले, तितकेच प्रेम ते माझ्या या भूमिकेवर देखील करतील याची मला खात्री आहे. 
बिग मॅजिक या वाहिनीवर प्रेक्षकांना कुंवारा है पर हमारा है ही मालिका पाहायला मिळणार आहे. या मालिकेत इशांत भानुशालीसोबतच छोट्या पडद्यावरचे काही प्रसिद्ध चेहरे प्रेक्षकांना पाहायला मिळणार असल्याची चर्चा आहे.