ठिपक्यांची रांगोळी मालिकेत होणार 'या' लोकप्रिय अभिनेत्रीची एंट्री, जाणून घ्या तिच्याविषयी

Thipkyanchi Rangoli : अप्पू आणि शशांकने घटस्फोट घेण्याचा निर्णय घेतला आहे. या दोघांना पुन्हा एकत्र आणण्यासाठी या अभिनेत्रीची एंट्री होणार आहे.

स्टार प्रवाहवरील ‘ठिपक्यांची रांगोळी’ मालिकेचं कथानक अतिशय उत्कंठावर्धक वळणावर येऊन पोहोचलं आहे. अप्पू आणि शशांकने घटस्फोट घेण्याचा निर्णय घेतला आहे. संपूर्ण कानेटकर फॅमिली अपूर्वा शशांकचा घटस्फोट थांबवण्यासाठी प्रयत्न करत असताना आता मालिकेत एका नव्या पात्राची एण्ट्री होणार आहे. दमयंती दुधखुळे असं या पात्राचं नाव असून ती विवाह सल्लागार असेल. अभिनेत्री विशाखा सुभेदार दमयंती दुधखुळे ही व्यक्तिरेखा साकारणार आहे.
 

ठिपक्यांची रांगोळी मधील या भूमिकेविषयी  सांगताना विशाखा सुभेदार म्हणाल्या, ‘मालिकेच्या नावाप्रमाणेच या मालिकेत मी एक छोटासा ठिपका असेन जो शशांक आणि अपूर्वाच्या नात्यात प्रेमाचे रंग भरण्याचा प्रयत्न करणार आहे. दमयंती दुधखुळे नावावरुनच ही व्यक्तिरेखा विनोदी असेल याचा अंदाज येतो. अतिशय भन्नाट व्यक्तिरेखा आहे. अप्पू-शशांकला एकत्र आणण्याच्या प्रयत्नात ती तिच्या आयुष्यातील गुंताही सोडवते. त्यामुळे प्रेक्षकांना ही भूमिका नक्कीच आवडेल. 

आपल्या विनोदी अभिनयशैलीने प्रेक्षकांचं निखळ मनोरंजन करणारी लोकप्रिय अभिनेत्री म्हणजे विशाखा सुभेदार (Vishakha Subhedar). 'महाराष्ट्राची हास्यजत्रा', 'कॉमेडी एक्स्प्रेस' अशा कितीतरी कार्यक्रमातून विशाखाने प्रेक्षकांना खळखळून हसवलं आहे.

त्यामुळे विशाखा सुभेदारचं मराठी कलाविश्वात एक दबदबा निर्माण झाला आहे. विशाखा मराठी कलाविश्वातील लोकप्रिय अभिनेत्री आहे. तिने आजवर अनेक कार्यक्रमांसह मालिका, चित्रपटांमध्येही काम केलं आहे. यात 'मस्त चाललंय आमचं', 'येड्यांची जत्रा', 'अरे आवाज कोणाचा', 'झपाटलेला २', 'सासूच स्वयंवर', 'दगडाबाईची चाळ', 'ये रे ये रे पैसा' अशा कितीतरी चित्रपटांमध्येही तिने काम केलं आहे.