'महाराष्ट्राची हास्यजत्रा'मधील या कलाकराची 'सहकुटुंब सहपरिवार' मालिकेत एन्ट्री

'महाराष्ट्राची हास्यजत्रा'मधील हा अभिनेता 'सहकुटुंब सहपरिवार' मालिकेत दिसणार वैभवच्या भूमिकेत

छोट्या पडद्यावरील लोकप्रिय विनोदी शो महाराष्ट्राची हास्यजत्रा(Maharashtrachi Hasyajatra)मधून अनेक कलाकार घराघरात पोहचले. या शोमधून अभिनेता निमिश कुलकर्णी(Nimish Kulkarni)ही घराघरात पोहोचला. निमिश शोमध्ये अधून मधून दिसत असला तरी त्याच्या विनोदी अभिनय कौशल्याने तो प्रेक्षकांच्या मनावर अधिराज्य गाजवतो आहे. दरम्यान आता निमिश लवकरच सहकुटुंब सहपरिवार (Sahkutumb Sahparivar) मालिकेत झळकणार आहे. 

निमिश कुलकर्णी सहकुटुंब सहपरिवार मालिकेत झळकणार आहे. काही दिवसांपूर्वीच या मालिकेत वैभवची भूमिका साकारणारा अभिनेता अमेय बर्वेने मालिकेला रामराम केला होता. आता अमेयच्या जागी या मालिकेत निमिश वैभव ही भूमिका साकारताना दिसणार आहे. खुद्द निमिशनेच त्याच्या सोशल मीडिया अकाऊंटवरुन पोस्ट शेअर करत चाहत्यांना ही बातमी दिली आहे.

निमिश कुलकर्णीने पोस्टमध्ये लिहिले की, नमस्कार मंडळी…आजपर्यंत मी केलेल्या प्रत्येक कामावर तुम्ही प्रेम केले आहे…आणि तुम्हीच दाखवलेल्या प्रेमामुळे मी एका नवीन भूमिकेत तुमच्यासमोर येतोय. ‘सहकुटुंब सहपरिवार’ या मालिकेत मी आजपासून वैभव हे पात्र साकारणार आहे. आधीच्या वैभववर जितकं प्रेम केलंत, तितकंच प्रेम माझ्यावरही राहू द्या.
निमिशच्या पोस्टवर चाहत्यांनी शुभेच्छांचा वर्षाव केला आहे आणि ते त्याला मालिकेत पाहण्यासाठी उत्सुक आहेत.