आई कुठे काय करते मालिकेच्या सेटवर कलाकार अशाप्रकारे ठेवतायेत स्वतःला फिट

‘आई कुठे काय करते’ या मालिकेच्या सेटवर जेवणापासून ते अगदी व्यायामापर्यंत सर्व काही ठरवून एकजुटीने केलं जातंय.

ठळक मुद्दे‘आई कुठे काय करते’ या मालिकेत संजनाची भूमिका साकारणारी अभिनेत्री रुपाली भोसलेने तिच्या फिटनेसचं रहस्य सांगितलं.

स्टार प्रवाहवरील ‘आई कुठे काय करते’ या मालिकेने प्रेक्षकांच्या मनात वेगळं स्थान निर्माण केलं आहे. कलाकारांचे दमदार अभिनय आणि तितक्याच ताकदीचे संवाद आणि दिग्दर्शनामुळे मालिका सध्या महाराष्ट्राच्या घराघरात पोहोचली आहे. मालिकेचं शूटिंग सध्या सिल्वासामध्ये सुरु आहे. त्यामुळे संपूर्ण टीम एकत्र एका छताखाली आहे. मालिकेच्या निमित्ताने एक छान कुटुंब तयार झालं आहे. त्यामुळे शूटिंगसोबतच सकाळचा नाश्ता, जेवणापासून ते अगदी व्यायामापर्यंत सर्व काही ठरवून एकजुटीने केलं जातंय.

‘आई कुठे काय करते’ या मालिकेत संजनाची भूमिका साकारणारी अभिनेत्री रुपाली भोसलेने तिच्या फिटनेसचं रहस्य सांगितलं. सेटवर मी अपूर्वा गोरे आणि गौरी कुलकर्णी म्हणजेच मालिकेतली इशा आणि गौरी आम्ही तिघी न चुकता व्यायाम करतो. योगासनांसोबतच निसर्गरम्य वातावरणात तासभर चालणं हे आमचं नित्याचं आहे. शूटिंग संपलं की आम्ही सर्व एकत्र डिनर करतो. त्यानंतर वॉक हा ठरलेला. शूटिंगमधूनही वेळ काढत हॉटेलच्या रुममध्ये आम्ही ठरवून व्यायाम करतो. लॉकडाऊनमुळे सध्या जिम वगैरेचा पर्याय नसल्यामुळे उपलब्ध गोष्टींचा सदुपयोग करण्याचा माझा प्रयत्न असतो. दिवसभराच्या गडबडीतून मी स्वत:साठी १ तास तरी काढते. 

पुढे ती सांगते, सध्या सेटवर खूपच आल्हाददायक वातावरण आहे. सेटच्या आजूबाजूला खूप झाडं आहेत. त्यामुळे मोकळी आणि शुद्ध हवा आम्ही अनुभवतोय. सध्याच्या घडीला ऑक्सिजनचं महत्त्व आपल्या सर्वांनाच कळतं आहे. त्यामुळे शूटिंगच्या निमित्ताने ही हिरवाई अनुभवायला मिळतेय याचा आनंद आहे. आम्हा सर्वांच्या डाएटचीही सेटवर काळजी घेतली जातेय. माझं प्रत्येकालाच एक आवाहन आहे की तुम्हीसुद्धा स्वत:च्या आरोग्यासाठी योग्य डाएट आणि व्यायामाची साथ घेतली तर उत्तम जीवनशैली अनुभवू शकाल.