राणादा आणि पाठक बाईंच्या चाहत्यांसाठी खुशखबर! लोकप्रिय जोडी झळकणार रुपेरी पडद्यावर

Hardik Joshi And Akshaya Deodhar: छोटा पडदा गाजवल्यानंतर आता हार्दिक जोशी आणि अक्षया देवधर ही लोकप्रिय जोडी रुपेरी पडद्यावर झळकण्यासाठी सज्ज झाली आहे.

झी मराठी वाहिनीवरील तुझ्यात जीव रंगला (Tuzyat Jeev Rangala) मालिकेनं प्रेक्षकांचा निरोप घेतला असला तरी या मालिकेतील राणादा आणि पाठक बाईंचं रसिकांच्या मनातील स्थान कायम आहे. राणादाची भूमिका अभिनेता हार्दिक जोशी(Hardik Joshi)ने तर पाठक बाईची भूमिका अभिनेत्री अक्षया देवधर(Akshaya Deodhar)ने साकारली होती. काही महिन्यांपूर्वी हार्दिक आणि अक्षयाने गुपचूप साखरपुडा करून चाहत्यांना सुखद धक्का दिला. छोटा पडदा गाजवल्यानंतर आता ही जोडी रुपेरी पडद्यावर झळकण्यासाठी सज्ज झाली आहे. ते दोघे पहिल्यांदाच चित्रपटात एकत्र दिसणार आहे.  'फाईल नंबर - ४९८ अ" या चित्रपटात हे दोघं महत्त्वाच्या भूमिकेत दिसणार आहेत.नुकतेच या चित्रपटाचं पोस्टर लाँच करण्यात आले.

आरती श्रीधर तावरे यांची निर्मिती असलेल्या आणि मनीष हर्षा मुव्हीज प्रस्तुत मल्हार गणेश दिग्दर्शित फाईल नंबर ४९८ अ या चित्रपटाची कथा श्रीधर तावरे यांनी लिहिली आहे. तर श्रीधर तावरे आणि आशिष निनगुरकर यांनी पटकथा लिहिली आहे. संवाद आणि गीतलेखन आशिष निनगुरकर यांचं आहे. स्वप्नील- प्रफुल्ल यांनी संगीत दिग्दर्शनाची जबाबदारी निभावली आहे. कायद्यातील  ४९८ अ या कलमाअंतर्गत एक तरुण कसा अडकतो याची गोष्ट या चित्रपटात मांडण्यात आली आहे. 

हार्दिक जोशी आणि अक्षया देवधर या जोडीवर महाराष्ट्रानं भरभरून प्रेम केलं आहे. या मालिकेनंतर आता त्यांचा नवा प्रवास सुरू झाला आहे. त्यामुळे ही जोडी पुन्हा कधी एकत्र दिसणार याकडे त्यांच्या चाहत्यांचं लक्ष लागलं होतं. हार्दिक, अक्षयानं पुन्हा एकत्र काम करण्याची चाहत्यांची इच्छा "फाईल नंबर ४९८ अ" या चित्रपटामुळे पूर्ण होणार आहे. या चित्रपटात हार्दिक आणि अक्षया प्रमुख भूमिकांमध्ये दिसतील. नावापासूनच उत्सुकता निर्माण केलेल्या या चित्रपटातून हार्दिक आणि अक्षया पहिल्यांदाच चित्रपटात एकत्र येणार असल्याने या चित्रपटाविषयीचं कुतूहल अधिकच वाढलं आहे हे नक्की.