‘ Indian Idol 12’ फेम सायली कांबळेच्या घरी लगीनघाई, दारी सजला लग्नाचा मांडव

Sayali Kamble : होय, सायली लवकरच लग्नबंधनात अडकणार आहे. मांडव स्थापनेचे फोटो व्हायरल

‘इंडियन आयडल 12’ (Indian Idol 12) हा सिंगींग रिअ‍ॅलिटी शो कधीच संपला. पण या सीझनच्या स्पर्धकांची चर्चा अधूनमधून होत राहते. तूर्तास चर्चा आहे ती ‘इंडियन आयडल 12’ची   सेकंड रनरअप सायली कांबळे (Sayali Kamble) हिची. होय, सायली लवकरच लग्नबंधनात अडकणार आहे.

‘इंडियन आयडल 12’मध्ये असताना सायलीच्या लव्ह लाईफची चर्चा अशीच रंगली होती. शोचा कंटेस्टंट निहाल तारोसोबत तिचं नाव जोडलं गेलं होतं. पण हा केवळ शोचा टीआरपी वाढवण्यासाठीचा फंडा होता. शो संपल्यानंतर स्वत: सायलीने तिच्या लव्हलाईफचा खुलासा केला होता.  प्रियकरासोबतचा एक रोमॅन्टिक फोटो शेअर करत तिने प्रेमाची जाहीर कबुली दिली होती. इतकंच नाही तर प्रियकराच्या नावाचाही खुलासा केला होता. यानंतर काही दिवसांनी सायलीने बॉयफ्रेन्ड धवलसोबत साखरपुडा उरकला होता. आता लवकरच सायली व धवल लग्नबंधनात अडकणार आहेत.

सायलीने तिच्या मांडव स्थापनेचे काही फोटो सोशल मीडियावर शेअर केले आहेत. त्याआधी सायलीने तिच्या केळवणाचे फोटोही शेअर केले होते.
 
 नुकतीच सायली विदेश दौऱ्यावरून परतली आहे. सध्या ती सोनी वाहिनीवरील एका रिअ‍ॅलिटी शोमध्ये मेंटॉरच्या भूमिकेत दिसत आहे.‘इंडियन आयडल 12’ संपल्यानंतर सायलीने ‘कोल्हापूर डायरी’ या सिनेमासाठी आपला आवाज दिला. अवधुत गुप्तेने या चित्रपटाला संगीत दिलं आहे.

View this post on Instagram

A post shared by Sayli Kamble (@saylikamble_music)

‘इंडियन आयडल 12’ सुरू असताना सायली कांबळेचा एक व्हिडिओ सोशल मीडियावर चांगलाच व्हायरल झाला होता. या व्हिडिओत ती सुरेश वाडकर यांच्यासोबत गाताना दिसली होती. हा व्हिडीओ व्हायरल होताच सायली नेटकऱ्यांच्या निशाण्यावर आली होती. सायलीने ‘इंडियन आयडल 12’मध्ये घरची परिस्थिती सांगितली होती.  मी एका चाळीत राहाते. माझ्या घरात टीव्हीदेखील नाहीये. माझे वडील रुग्णवाहिका चालक आहेत, असा खुलासा तिने केला होता.  पण सुरेश वाडकर यांच्यासारख्या दिग्गजांसोबत  स्टेज परफॉर्मन्स देतानाचा तिचा व्हिडिओ व्हायरल झाल्यानंतर सायलीवर खोटं बोलल्याचा आरोप नेटकऱ्यांनी केला होता.