इंडियन आयडल विजेता अभिजीत सावंत या कार्यक्रमात बजावणार परीक्षकाची भूमिका

इंडियन आयडल या रिअॅलिटी शो मुळे प्रसिद्धीझोतात आलेला अभिजीत सावंत आता परीक्षकाच्या भूमिकेत झळकणार आहे. 

इंडियन आयडल या कार्यक्रमामुळे अभिजीत सावंतला चांगलीच प्रसिद्धी मिळाली. या कार्यक्रमाच्या पहिल्या सिझनचे त्याने विजेतेपद मिळवले होते. या कार्यक्रमाचे आजवर अनेक सिझन आले असले तरी अभिजीत सावंत हा सगळ्या स्पर्धकांमध्ये प्रेक्षकांच्या चांगलाच लक्षात आहे. कारण या कार्यक्रमाच्या पहिल्या सिझनचा विजेता होण्याचा बहुमान त्याला मिळाला होता. 
अभिजीत सावंतने या रिअॅलिटी शो नंतर अनेक चित्रपटांमध्ये गाणी गायली आहेत. तसेच त्याचे अनेक अल्बमदेखील आले होते. तो देश-विदेशात गाण्याचे कार्यक्रम देखील करतो. अभिजीतने चित्रपटात काम देखील केले होते. पण एक अभिनेता म्हणून त्याला यश मिळाले नाही. एका रिअॅलिटी शो मुळे प्रसिद्धीझोतात आलेला अभिजीत सावंत आता परीक्षकाच्या भूमिकेत झळकणार आहे. 
अँड टिव्ही या वाहिनीवर लवकरच लव्ह मी इंडिया हा कार्यक्रम सुरू होणार आहे. हा गायनाचा कार्यक्रम असून या कार्यक्रमात परीक्षकाच्या भूमिकेत प्रेक्षकांना अभिजीत सावंतला पाहायला मिळणार आहे. या कार्यक्रमात स्पर्धकांची विभागणी चार झोन मध्ये करण्यात येणार आहे. पूर्व, पश्चिम, उत्तर, दक्षिण असे चार झोन असून प्रत्येक झोनचा एक कॅप्टन असणार आहे. हा कॅप्टन टीममधील स्पर्धकांचे मार्गदर्शन करणार आहे. अभिजीतसोबतच गुरू रंधावा, हिमेश रेशमिया आणि नेहा भसिन या कार्यक्रमात परीक्षकाच्या भूमिकेत झळकणार आहेत. अभिजीत सावंतने एका रिअॅलिटी शो पासून त्याच्या कारकिर्दीला सुरुवात केली. त्यामुळे एका रिअॅलिटी शोमध्येच परीक्षकाची भूमिका साकारणे म्हणजे आपल्याच घरी परत आल्यासारखे असल्याचे अभिजीत सांगतो. अभिजीत लव्ह मी इंडिया या कार्यक्रमात परीक्षकाची भूमिका बजावण्यासाठी खूप उत्सुक आहे. तो सांगतो, रिअॅलिटी शो मधील मेन्टरने जे काही मला मार्गदर्शन दिले, त्याचमुळे मी आज हे यश मिळवू शकलो आहे. आज पुढच्या पिढीला मार्गदर्शन देण्याची मला संधी देण्यात आली असल्याने मी खूप खूश आहे. 
अभिजीत सावंत प्रमाणेच इंडियन आयडल कार्यक्रमाची स्पर्धक नेहा कक्कर देखील सध्या प्रेक्षकांना परीक्षकाच्या भूमिकेत पाहायला मिळत आहे. ती इंडियन आयडल या कार्यक्रमातच परीक्षकाची भूमिका बजावत आहे.