​यांचा साजरा केला गेला वाढदिवस कोण होईल मराठी करोडपतीच्या सेटवर

क�

��ण होईल मराठी करोडपतीच्या सेटवर आतापर्यंत अनेक सेलिब्रिटींनी हजेरी लावली आहे. महेश मांजरेकर, मेधा मांजरेकर, सोनाली कुलकर्णी, प्रिया बापट, सई ताम्हणकर यांनी या मंचावर येऊन आतापर्यंत चांगली रक्कम जिंकली आहे. सेलिब्रिटींनी जिंकलेली रक्कम एखाद्या सेवाभावी संस्थेला देण्यात येते अथवा ही रक्कम एखाद्या चांगल्या कार्यासाठी वापरण्यात येते. या सेलिब्रिटींनंतर आता आणखी एक महान सेलिब्रिटी या कार्यक्रमात हजेरी लावणार आहे. सिंधुताई सपकाळ या कार्यक्रमात येणार आहेत. 
सिंधुताई सपकाळ यांना अनाथांची आई म्हणूनच ओळखले जाते. त्यांनी आतापर्यंत अनेक अनाथांना आधार दिला आहे. आपल्या कार्य़ातून त्यांनी समाजात आपली एक वेगळी ओळख निर्माण केली आहे. त्यांच्याकडून प्रत्येकाने खूप काही शिकण्याची गरज आहे. त्यांच्या आयुष्यावर आणि कार्यावर आधारित सिंधुताई सपकाळ हा चित्रपटही बनवण्यात आला होता. या चित्रपटात तेजस्विनी पंडितने प्रमुख भूमिका साकारली होती. सिंधुताई यांनी अनेक निराधारांना आपल्या मायेच्या स्पर्शाने आपलेसे केले आहे. या सिंधुताई बालदिनाच्या निमित्ताने कोण होईल मराठी करोडपती या कार्यक्रमाच्या सेटवर येणार आहेत. या कार्यक्रमात येऊन त्या खेळ खेळण्यासोबतच अनेक जुन्या आठवणींना उजाळा देणार आहेत. तसेच स्वतःच्या सुखात दुसऱ्यांचे दुःख विसरू नका हा मोलाचा सल्लादेखील उपस्थितांना देणार आहेत. तसेच 14 नोव्हेंबरला सिंधुताई सपकाळ यांचा वाढदिवसदेखील असतो. त्यांचा वाढदिवसही या कार्यक्रमाच्या मंचावर साजरा केला जाणार आहे. प्रेक्षकांना या कार्यक्रमात सिंधुताईंचे एक वेगळे रूप पाहायला मिळणार आहे.