प्रसिद्ध मराठी अभिनेत्याने ताज हॉटेलमध्ये साजरा केला आईचा वाढदिवस;व्हिडीओ होतोय व्हायरल

Saorabh chaugule : 'जीव माझा गुंतला'फेम अभिनेत्याने दिलं आईला गोड सरप्राईज

छोट्या पडद्यावर सध्या गाजत असलेली मालिका म्हणजे 'जीव माझा गुंतला'. या मालिकेतील अंतरा आणि मल्हार या जोडीने प्रेक्षकांना अल्पावधीत आपलंसं केलं. त्यामुळे सोशल मीडियावर त्यांची कायम चर्चा रंगताना पाहायला मिळते. यात सध्या मल्हारची म्हणजेच अभिनेता सौरभ चौघुले (Saorabh chaugule) यांची चर्चा रंगली आहे. अलिकडेच सौरभने त्याच्या आईचा वाढदिवस दणक्यात साजरा केला. मुंबईतील ताज हॉटेलमध्ये जाऊन त्याने आईला गोड सरप्राईज दिली. याविषयी त्याने एक पोस्ट शेअर करुन चाहत्यांना माहिती दिली आहे.

"काही दिवसांपूर्वीच मम्मीचा वाढदिवस झाला. दरवर्षी आहे माझ्या वाढदिवसाला काही ना काही तरी स्पेशल करायची जसं शॉपिंग करून देणार किंवा एक मोबाईल घेऊन देणार. गेले दोन वर्ष कोल्हापुरात शूट करत होतो, म्हणून तिच्या वाढदिवसाला राहता नाही आलं आणि आमचा शो मुंबईत आला तेव्हा ठरवलं की मम्मीसाठी काहीतरी स्पेशल करायचं पण करणार काय काहीच कळत नव्हतं ,असंच एक प्लान केला की मम्मीला ताज हॉटेलला घेऊन जायचं. तेही तिला न सांगता- एक सरप्राईज. फोटो काढायला जातोय मरीन लाईन्सला असं सांगून जसं मरीन लाईन जवळ आलं तिच्या डोळ्यांना पट्टी बांधली आणि तिथेच ताज हॉटेलच्या दारात जाऊन उघडली.तिला कळेना की आपण कुठे आलोय, पण जेव्हा तिला सांगितलं तिला काय रिऍक्ट करावा ते कळलंच नाही! आतमध्ये जाऊन फूड ऑर्डर करणं सोडून तिने सगळ्यात आधी आपल्या सगळ्या मैत्रिणींना आणि मित्रांना फोन करून सांगितलं की सौरभ मला ताज हॉटेलला घेऊन आलाय बर्थडेसाठी तिला इतकं आनंदी कधीच पाहिलं नव्हतं", असं सौरभने म्हटलं.

View this post on Instagram

A post shared by Saorabh Rajnish Choughule (@mesaorabh)

पुढे तो सांगतो, "ती ऑफिसला ताज जवळच होती. पण ती कधी ताजमध्ये गेली नाही. आज गेली तर आनंद तिच्या चेहऱ्यावरून झळकत होता. फोटो काढायची आवड म्हणून हॉटेलमध्ये सगळ्या ठिकाणी, प्रत्येक कोपऱ्यात फोटोज् काढले. पहिल्यांदा तिच्या चेहऱ्यावर इतका आनंद पाहिलंय. तिला असं आनंदी बघून मी अजून काय करू हिच्यासाठी तेच कळत नव्हतं पण एक नक्की ही एक सुरुवात आहे अजून खूप काही करायचंय तुझ्यासाठी मम्मी... PS. तिला सरप्राइज खूप आवडलं हे घरी गेल्यावर माझ्या रूम मध्ये मी कार पार्क करून येण्याआधीच AC चालू करून ठेवला होता ह्यावरून कळलं."

दरम्यान, सध्या सोशल मीडियावर सौरभची ही पोस्ट व्हायरल होत असून अनेकांनी त्याच्यावर कौतुकाचा वर्षाव केला आहे. सौरभ मराठीतील लोकप्रिय अभिनेता आहे. सौरभने जीव माझा गुंतला व्यतिरिक्त काही मालिका, वेबसीरिजमध्येही काम केलं आहे. 'लक्ष्य', 'क्राईम डायरी', 'गर्जा  महाराष्ट्र', ‘दख्खनचा राजा ज्योतिबा’  या मालिकांमध्ये काम केलं आहे. तर, ‘मीटर डाऊन’ या वेब सीरिजमध्येही त्याने काम केलं आहे.