'शारख्या, भावा तुझा स्पर्श ह्यो परीसाचा स्पर्श' किरण मानेंची शाहरुख खानसाठी केलेली पोस्ट चर्चेत

बॉलिवूडवर राज्य करणाऱ्या शाहरुखचे मराठमोळे किरण मानेही फॅन आहेत. त्यांनी शाहरुखसाठी पुन्हा एक खास पोस्ट शेअर केली आहे.

बॉलिवूडचा किंग शाहरुख खान हा ‘जवान’ चित्रपटामुळे चर्चेत आहे. चित्रपटात शाहरुखचा हटके अंदाज आणि सिनेमातील लूक पाहून चाहते भारावून गेले आहेत. शाहरुखने ‘जवान’मधून बॉक्स ऑफिसवर धमाका केलाय. प्रेक्षकांप्रमाणेच अनेक सेलिब्रिटीही किंग खानचे चाहते आहेत. बॉलिवूडवर राज्य करणाऱ्या शाहरुखचे मराठमोळे किरण मानेही फॅन आहेत.

शाहरुखच्या ‘जवान’चा ट्रेलर पाहिल्यानंतर किरण माने यांनी एक खास पोस्ट केली होती. त्या पोस्टला चाहत्यांकडून आलेला प्रतिसाद पाहून किरन माने भारावून गेले आहेत. त्यांनी शाहरुखसाठी पुन्हा एक खास पोस्ट शेअर केली आहे. त्यांची ही खास पोस्ट सध्या चर्चेत आहे. 

किरण मानेंनी पोस्टमध्ये काय म्हटलं?

आग्गाग्ग्गगागा... एक लाखाच्या वर लाईक्स... पाचशेच्या वर कमेन्टस्... दोन हजाराच्या वर शेअर्स... आणि तब्बल एक मिलीयन, म्हणजे दहा लाखाच्या वर व्हियूज ! अजूनबी सुरुच आहे. ते ही माझ्या फेसबुक पोस्टवर !! इन्स्टा-युट्यूबवर नव्हे. नादखुळाच !!!

...आजपर्यन्त माझ्या कुठल्याही पोस्टचे लाईक्स मी मोजले नाहीत. हो, पण कोण लाईक करतंय आणि कमेन्टस् काय येताहेत हे मात्र आवर्जुन पहातो, यातून समविचारी लोक कळतात, जवळ येतात. विषारी घाण दूर जाते. नको असलेला कचरा बाहेर जाऊन महाराष्ट्रभरात माझा मित्रमेळा पसरला तो यामुळेच... चाहते, प्रेम करणारी माणसं माझ्याशी संवाद साधू लागली. आयुष्य बहरून गेलं. काही जणांच्या दृष्टीनं हे 'आभासी जग' असो, मला मात्र यातून जिवंत, रसरशीत, हाडामासांचा, जीवाला जीव देणारा गोतावळा लाभला. माझ्यावर वाईट वेळ आली होती, तेव्हा अख्ख्या सोशल मिडीयानं आवाज उठवून भल्याभल्यांची हवा टाईट केलीवती, ती उगाच नाय.

कालपासून मात्र माझ्या फेसबुक अकाऊंटवर छप्परतोड, आजपर्यन्तचा रेकाॅर्डब्रेक कहर झालाय ! मी 'जवान'च्या स्क्रीनिंगच्या वेळचा एक व्हिडीओ शेअर केला, त्याला फक्त महाराष्ट्रातूनच नव्हे, देशभरातून नव्हे, आशियातून नव्हे, तर जगभरातून प्रचंड रिस्पाॅन्स मिळाला. श्रीलंका, बांग्लादेश, इंडोनेशिया, मलेशिया, पाकिस्तान, नेपाळ, साऊथ कोरीया, दुबई, म्यानमार, सौदी अरेबीया, इंग्लंड, अमेरीका, बल्गेरीया वगैरे वगैरे देशांमधले लोक माझ्या पोस्टवर आले. वर आकडे दिलेले आहेत. ते वाढतच चाल्लेत, 'जवान'च्या करीश्म्यासारखे.

शारख्या, भावा तुझा स्पर्श ह्यो परीसाचा स्पर्श हाय... साध्या गोष्टीचबी सोनं करतोस तू... 'सिनेमा इंडीया' जगभरात लखलखतोय, झळाळतोय तुझ्या मिडास टच मुळं ! रूंब रूंब रूंब नांद्री... आणि लब्यू लैच ❤️

- किरण माने.

 

 ‘जवान’ ७ सप्टेंबरला प्रदर्शित झाला आहे. प्रसिद्ध दाक्षिणात्य दिग्दर्शक अ‍ॅटली कुमारने जवानचे दिग्दर्शन केले आहे. या चित्रपटात शाहरुख खान, दीपिका पदुकोण, नयनतारा, विजय सेतुपथी, सुनिल ग्रोव्हर या कलाकारांच्या मुख्य भूमिका आहेत. याबरोबरच मराठमोळी अभिनेत्री गिरीजा ओकही या चित्रपटात झळकली आहे. हिंदी, तमिळ, तेलुगु या भाषांमध्ये हा चित्रपट प्रदर्शित करण्यात आला आहे.