'कलाकार म्हणून मी काय कमावलं?'; प्रसिद्ध मिळवल्यानंतरही गौरव मोरे देतो ऑडिशन

Gaurav more: गौरव मोरेने तो आजही ऑडिशन्स का देतो या मागचं कारण सांगितलं आहे.

सध्याच्या घडीला गौरव मोरे ( gaurav more) हे नाव कोणत्याही व्यक्तीसाठी नवीन नाही. आपल्या विनोदबुद्धीच्या जोरावर गौरवने तुफान लोकप्रियता मिळवली आहे. इतकंच नाही तर महाराष्ट्राची हास्यजत्रा या कार्यक्रमाच्या माध्यमातून प्रेक्षकांच्या भेटीला येणारा गौरव आता रुपेरी पडद्यावरही झळकू लागला आहे. त्यामुळे त्याच्या यशाचा आलेख हळूहळू उंचावताना दिसतो. विशेष म्हणजे लोकप्रियता, नावलौकिक मिळाल्यानंतरही गौरव आजही ऑडिशन्स देतो. यामागचं कारण त्याने नुकत्याचं एका मुलाखतीमध्ये दिलं.

अनेक गाजलेल्या रिअॅलिटी शो, सिनेमांमध्ये काम केल्यानंतर गौरव आता हिंदी सिनेमात झळकणार आहे. या सिनेमाच्या निमित्ताने त्याने 'महाराष्ट्र टाइम्स'ला एक मुलाखत दिली. या मुलाखतीमध्ये त्याने आजही त्याला ऑडिशन्स का द्यावे लागतात या मागचं कारण सांगितलं.

"मला ऑडिशनचं व्यसन आहे. काही दिवसांपूर्वी मी इतके ऑडिशन्स दिलेत की सकाळी १०-११ वाजता घर सोडायचो ते थेट रात्रीच घरी परतायचो. प्रेक्षकांपर्यंत पोहोचण्यासाठी लोक वेगवेगळ्या ठिकाणाहून मुंबईत येतात. दिवस-रात्र मेहनत करतात. मी पवईमध्येच राहतो. तिथून अंधेरी फक्त तासभराच्या अंतरावर आहे. जर इथे राहूनही मी दिवसभर घरी बसलो तर कलाकार म्हणून मी काय कमावलं, या वचारातून मी ऑडिशन्स देतो", असं गौरव म्हणाला.

'ही' चूक गौरव मोरेला पडली महागात; लंडनच्या विमानतळावर झाली कसून चौकशी

पुढे तो म्हणतो, "मी हिंदी- मराठी सिनेमा, नाटकांचे काही पॅच तयार करुन ठेवले आहेत. विजयकुमार यांच्याकडे अभिनय शिकायला जायचो. पुढे चित्रपटांमध्ये लहानमोठ्या भूमिका मिळत गेल्या. मला सिनेमा करायला आवडतो. "

दरम्यान, गौरव मोरे याने आजवर नाटक, एकपात्री प्रयोग, व्यावसायिक नाटक, पथनाट्य असा बराच मोठा प्रवास केला आहे. तसंच त्याने काही सिनेमांमध्येही काम केलं आहे. गौरव लवकरच  ‘लंडन मिसळ’, ‘सलमान सोसायटी’, ‘महापरिनिर्वाण’ या सिनेमांमध्ये दिसणार आहे.