संकर्षण कऱ्हाडेच्या भावाची 'या' मालिकेत एन्ट्री! अभिनेता म्हणाला- "सतत कामाच्या शोधात असणारा..."

संकर्षण कऱ्हाडेने सोशल मीडियावर एक पोस्ट शेअर केली आहे.

Sankarshan Karhade: संकर्षण कऱ्हाडे (Sankarshan Karhade) हा मराठी सिनेसृष्टीतील लोकप्रिय अभिनेता आहे. त्याशिवाय तो एक उत्तम, संवेदनशील कवीदेखील आहे. वेगवेगळ्या मालिका, नाटक तसेच चित्रपटांमधून त्याने काम केलं आहे. संकर्षण सोशल मीडियावरही (Social Media) कमालीचा सक्रीय आहे. त्याद्वारे त्याच्या वैयक्तिक आयुष्यासह प्रोजेक्टसंदर्भात तो चाहत्यांना माहिती देतो. नुकतीच अभिनेत्याने सोशल मीडियावर शेअर केलेल्या पोस्टमुळे नेटकऱ्यांचं लक्ष वेधलं आहे. 

संकर्षणने या पोस्टद्वारे त्याच्या भावाच्या नव्या प्रोजक्टबद्दल माहिती देत खास पोस्ट शेअर केली आहे. या पोस्टद्वारे त्याच्या भाऊ अधोक्षज कऱ्हाडे'ची  झी मराठी वाहिनीवरील 'लाखात एक आमचा दादा' या मालिकेत एन्ट्री होणार असल्याचं सांगितलं आहे. या मालिकेत अधोक्षय समीर निकम नावाची भूमिका साकारणार आहे. इन्स्टाग्रामवर आपल्या भावाचा फोटो पोस्ट करत त्याला कॅप्शन देत अभिनेत्याने लिहलंय, "रोज सकाळी ५.३० वा. उठायचं ,जीम ट्रेनर ला एकवेळ व्यायामाचा कंटाळा आला तर त्याच्या वाट्याचे डंबेल्स उचलून घरी यायचं,आल्यावर कसल्या कसल्या स्मुदी , शेक प्यायचं,ठरल्यावेळीच , ठरलेलंच जेवायचं ,आणि ठरल्यावेळीच झोपायचं. माझ्याशी ,माझ्या वागण्याशी, सवयींशी एकही गोष्टं नं जुळणारा हा माझा सख्खा भाऊ,  एक आवड आमच्यात समान “अभिनयाची” सतत धडपडत , कामाच्या शोधात असतो. त्याला एक छान संधी मिळालीये. तुमचेही आशीर्वाद , शुभेच्छा असू द्या."

झी मराठी वाहिनीवरील 'लाखात एक आमचा दादा' या मालिकेत दिवसेंदिवस नवनवीन ट्विस्ट पाहायला मिळायला मिळतायत.या मालिकेला प्रेक्षकांची पसंती मिळताना दिसते आहे. मालिकेत सूर्या सोबत कठोर वागणारे डॅडी सध्या त्याच्याशी अचानक चांगलं वागत असल्याचा सीक्वेन्स मालिकेत सुरू आहे. त्यात आता नव्या पात्राची एन्ट्री होणार असल्याने प्रेक्षक देखील उत्सुक  आहेत.