'आई बाबा रिटायर होत आहेत' मालिकेची स्टारकास्ट समोर; निवेदिता सराफ यांचा मुलगा अन् सूनेच्या भूमिकेत दिसणार 'हे' कलाकार

स्टार प्रवाहकडून आई बाबा रिटायर होत आहेत! मालिकेचा नवा प्रोमो शेअर करण्यात आला आहे.

Aai Baba Retire Hot Aahet: टीआरपीच्या शर्यतीत टिकून राहण्यासाठी चॅनेलकडून वेगवेगळे प्रयोग करण्यात येतात. कधी जुन्या मालिका ऑफ एअर जातात आणि त्यांची जागा नवी मालिका येत असतात. दरम्यान, स्टार प्रवाह वाहिनीवर येत्या काही दिवसांमध्ये नव्या मालिका प्रेक्षकांच्या भेटीला येणार आहेत. त्यामुळे मराठी मालिकाविश्वात स्टार प्रवाहच्या आगामी मालिकांची चांगलीच चर्चा होत आहे. अलिकडेच स्टार प्रवाह वाहिनीने 'आई बाबा रिटायर होत आहेत', 'लग्नानंतर होईलच प्रेम' तसेच 'तु ही रे माझा मितवा' या नव्या मालिकांची घोषणा केली आहे. अशातच नुकताच निवेदिता सराफ तसेच अभिनेते मंगेश कदम मुख्य भूमिकेत असलेली आई बाबा रिटायर होत आहेत! ही मालिकेचा नवीन प्रोमो शेअर करण्यात आला आहे. या प्रोमोमध्ये मालिकेत निवेदिता सराफ, मंगेश कदम यांचा मुलगा आणि सूनेच्या भूमिकेत कोण असणार याचा उलगडा करण्यात आला आहे.

सोशल मीडियावर आई बाबा रिटायर होत आहे त मालिकेचा प्रोमो चर्चेचा विषय ठरला. शिवाय या प्रोमोला प्रेक्षकांची पसंती मिळताना दिसते. स्टार प्रवाहने शेअर केलेल्या प्रोमोमध्ये दोन नवे चेहरे समोर आले आहेत. निवेदिता सराफ, मंगेश कदम यांचा मुलगा आणि सूनेच्या भूमिकेत अभिनेता हरिश दुधाडे दिसणार आहे. तर 'देवमाणूस' फेम अभिनेत्री प्रतिक्षा जाधव सूनेची भूमिका साकारणार आहे. येत्या २ डिसेंबरपासून ही मालिका प्रेक्षकांच्या भेटीला येणार आहे. शिवाय ही मालिका दुपारच्या सत्रात प्रसारित केली जाणार आहे. 

अभिनेता हरिश दुधाडे आणि प्रतिक्षा जाधव कलाकार मराठी कलविश्वातील लोकप्रिय कलाकार आहेत. वेगवेगळ्या मराठी मालिका चित्रपटांमध्ये त्यांनी काम केलं आहे. दरम्यान, आता 'आईबाबा रिटायर होत आहेत' मालिकेत प्रेक्षकांना वेगळं काय पाहायला मिळणार हे पाहणं महत्वाचं ठरेल.