"आईनंतर दुःख बाजूला सारून...", समृद्धी केळकरची वडिलांसाठी भावुक पोस्ट, म्हणाली- "आज मी जे काही आहे..."

समृद्धी केळकरची वडिलांसाठी भावुक पोस्ट, म्हणाली- "आज मी जे काही आहे..."

Samruddhi Kelkar: मराठी मालिकाविश्वातील लोकप्रिय अभिनेत्री म्हणजे समृद्धी केळकर (Samruddhi Kelkar). 'फुलाला सुगंध माती'च्या या मालिकेतून तिने प्रचंड लोकप्रियता मिळवली. या मालिकेत तिने साकारलेली किर्ती प्रेक्षकांना प्रचंड भावली. यानंतर समृद्धीने मी होणार सुपरस्टार या कार्यक्रमाचे सूत्रसंचालन करताना दिसली. दरम्यान, समृद्धी केळकर सोशल मीडियावर प्रचंड सक्रिय असून तिच्या वैयक्तिक आयुष्यातील अनेक गोष्टी शेअर करत असते. नुकतीच तिने वडिलांच्या वाढदिवसानिमित्त सुंदर पोस्ट शेअर केली आहे. 

समृद्धीने तिच्या सोशल मीडियावर पोस्ट लिहून बाबांसोबतचा खास फोटो पोस्ट केला आहे. या पोस्टमध्ये अभिनेत्रीने लिहिलंय की, "बाबा... माझ्या आयुष्यातली सगळ्यात महत्वाची, लाडकी , प्रेमळ ,खंबीर व्यक्ती. स्वप्न पूर्ण करताना आपली माणसं आपल्यासोबत असली की आपला मार्ग सोपा होतो. आज मी जे काही आहे ते फक्त या व्यक्तीमुळे. आईनंतर दुःख बाजूला सारून खंबीरपणे आई आणि बाबा असं दोन्ही होऊन आम्हा मुलींना फार लाडात वाढवलं आणि आजही आमचं आणि नातवाचं तेवढंच सगळं प्रेमाने करतात. कायम प्रोत्साहन देणारे, शूटिंगला जाताना डबा भरून देणारे, पोहोचलीस का जेवलीस का म्हणून सारखे फोन करणारे, वेळेप्रसंगी कठोर होणारे , चहा प्रेमी,माझा फसलेला पदार्थ तक्रार न करता मिटक्या मारत खाणारे,फोन कमी वापर म्हणून lecture देणारे ,कुठेही कधीही डुलकी काढण्याचं कौशल्य असणारे,दिवसभरात वेळ मिळेल तेव्हा हास्यजत्रेची पारायणं करणारे, मी केलेल्या कामाचे भाग परत परत बघणारे, कौतुक करणारे असे हे माझे बाबा...".
 
पुढे अभिनेत्रीने लिहिलंय, जगात मी कोणाला (आदरयुक्त) घाबरत असेन तर फक्त यांनाच..., भांडणाशिवाय जीवनात गंमत नाही ह्यावर आमचा ठाम विश्वास असल्याने आम्ही दररोज न चुकता भांडतो मग कारण काहीही असो ते एका गरमागरम चहाच्या कपावर मिटतं. “मी तुला सोडायला येतो आणि आणायला येतो” संघटनेचे अध्यक्ष प्रमुख सुनिल केळकर (बाबा) यांना वाढदिवसाच्या ह्या तुमच्या लाडक्या शेंडेफळाकडून खूप खूप शुभेच्छा…. असेच कायम आनंदी रहा… thank you for everything and love you alot..., टीप-( diet करायच्या फंदात पडू नका..तुम्ही आम्हाला तुमच्या वाढलेल्या पोटासकट आवडता ). अशी पोस्ट अभिनेत्रीने लिहिली आहे.