सुख म्हणजे नक्की काय असतं: 25 वर्षानंतरही शालिनी इतकी तरुण कशी? मालिका होतीये ट्रोल

Sukh mhanje nakki kay asta: या मालिकेत २५ वर्षांचा लीप घेण्यात आला आहे. विशेष म्हणजे २५ वर्षानंतरही शालिनीच्या लूकमध्ये कोणताही बदल न झाल्यामुळे नेटकऱ्यांनी ट्रोलिंग सुरु केलं आहे.

छोट्या पडद्यावरील तुफान लोकप्रिय झालेली मालिका म्हणजे 'सुख म्हणजे नक्की काय असतं' (sukh mhanje nakki kay asta). ही मालिका सुरु झाल्यापासून प्रेक्षकांमध्ये लोकप्रिय झाली आहे. त्यामुळे या मालिकेत येणाऱ्या चढउतारांमुळे प्रेक्षकांची उत्सुकता कायमच शिगेला पोहोचताना दिसते. यात नुकताच मालिकेत २५ वर्षांचा लीप घेण्यात आला. यात २५ वर्षानंतर गौरी आणि जयदीपचा पुनर्जन्म होतो. इतकंच नाही तर शालिनीची पुन्हा त्यांच्या आयुष्यात एन्ट्री होते. परंतु, यावेळी शालिनीचा लूक पाहून नेटकऱ्यांनी तिची खिल्ली उडवली आहे.

काही दिवसांपूर्वीच मालिकेत पुन्हा एकदा शालिनीची एन्ट्री झाली. मात्र, २५ वर्षानंतरही तिचा लूक ग्लॅमरस आणि बोल्ड दाखवल्यामुळे नेटकऱ्यांनी या मालिकेला ट्रोल केलं आहे. साधारणपणे २५ वर्षानंतर जर मालिकेत शालिनीची एन्ट्री होत असेल तर ती वयस्क दाखवणं अपेक्षित आहे. मात्र, २५ वर्षानंतर ती पूर्वीपेक्षाही जास्त ग्लॅमरस दिसून येत आहे. त्यामुळे निदान मालिका दाखवताना थोडा विचार करुन दाखवा, असा सल्लाही नेटकऱ्यांनी दिला आहे.

दरम्यान, 'शालिनी तर नित्यापेक्षाही जास्त तरुण दिसते', 'ती संतूर मॉम आहे', 'अहो, जरा विचार करुन तरी दाखवा', अशा कितीतरी कमेंट करुन नेटकऱ्यांनी सध्या टीकेची झोड उठवली आहे.