अजितकुमारला धडा शिकवण्यासाठी होणार मार्तंडची एन्ट्री; 'हा' अभिनेता साकारणार महत्त्वपूर्ण भूमिका

Devmanus: पहिल्या पर्वामध्ये अजितकुमारला कोणाचाही धाक नसल्याचं पाहायला मिळतं. त्यामुळे दिवसेंदिवस त्याच्या कारवाया वाढत असल्याचं पाहायला मिळालं. मात्र, त्याच्या या कारवायांना आता आळा बसणार आहे.

झी मराठीवरील देवमाणूस ही मालिका दिवसेंदिवस लोकप्रिय होत आहे. या मालिकेत येणारे रंजकदार वळणं पाहून प्रेक्षकांना मालिकेतील पुढच्या भागात काय होणार हे जाणून घेण्याची कमालीची उत्सुकता लागलेली असते. अलिकडेच या मालिकेत डॉ. अजितकुमार आणि डिंपल यांचा थाटा लग्नसोहळा पार पडला. त्यामुळे सध्या या मालिकेत आनंदाचे क्षण दिसून येत आहे. मात्र, यामध्येच अजितकुमारला धडा शिकवण्यासाठी या मालिकेत एका नव्या पात्राची एन्ट्री होणार आहे.

पहिल्या भागाप्रमाणेच गाजत असलेल्या दुसऱ्या भागात डॉ. अजितकुमारची नवनवीन रुपं प्रेक्षकांना पाहायला मिळत आहेत. पहिल्या पर्वात अजितला पोलीस इन्स्पेक्टर दिव्या सिंग लग्नाच्या मंडपातून खेचून पोलीस स्टेशनमध्ये घेऊन जाते. परंतु, या पर्वातमध्ये त्याला कोणाचाही धाक नसल्याचं पाहायला मिळतं. त्यामुळे दिवसेंदिवस त्याच्या कारवाया वाढत असल्याचं पाहायला मिळालं. मात्र, त्याच्या या कारवायांना आता आळा बसणार आहे.  कारण, या मालिकेत लवकर मार्तंड जामकर या नव्या पात्राची एन्ट्री होणार आहे. 

अनेक मालिकांमध्ये खलनायकाची भूमिका साकारुन लोकप्रियता मिळवणारा अभिनेता मिलिंद शिंदे या मालिकेत मार्तंडची भूमिका साकारणार आहे. आपल्या उत्तम अभिनय कौशल्याने मिलिंद शिंदे यांनी आपल्या प्रत्येक भूमिकेची छाप प्रेक्षकांच्या मनावर पाडली आहे. त्यामुळे आता देवमाणूस या मालिकेत एका रंजक वळणावर मिलिंद शिंदेची मार्तंड जामकर ही भूमिका पाहणं औस्त्युक्याच ठरणार आहे. 

"देवमाणूस ही मालिका खूपच लोकप्रिय आहे आणि या मालिकेतील अजितकुमारची व्यक्तिरेखा खूप दमदार आहे. या पर्वात मार्तंड जामकर ही महत्वपूर्ण भूमिका मी साकारतोय याचा मला खूप आनंद आहे. याआधी देखील प्रेक्षकांनी माझ्या सर्व भूमिकांना डोक्यावर उचलून धरलं त्यामुळे ही भूमिका देखील त्यांच्या लक्षात राहील आणि त्यांना आवडेल अशी मला खात्री आहे. अजितकुमार आणि मार्तंड यांची जुगलबंदी प्रेक्षकांना लवकरच बघायला मिळेल," असं मिलिंद शिंदे म्हणाला.

दरम्यान, मार्तंड जामकारमुळे अजितकुमारसमोर कुठलं नवीन आव्हान उभं राहणार? अजितकुमारचा चांगुलपणाचा मुखवटा फाडून त्याचा खरा चेहरा गावकऱ्यांसमोर येईल? हे प्रेक्षकांना लवकरच मालिकेत पाहायला मिळेल.