'कुछ रीत जगत की ऐसी है'मधील लग्नाच्या सीनसाठी मीरा देवस्थळेनी परिधान केला ३५ किलोचा लेहेंगा

'कुछ रीत जगत की ऐसी है' या मालिकेच्या सध्या सुरू असलेल्या कथानाकात, रतनशी कुटुंबीय एकत्र येऊन त्यांच्या घरात नंदिनीचे उत्साहात स्वागत करण्याची योजना आखतात.

सोनी एन्टरटेन्मेंट टेलिव्हिजनवरील ‘कुछ रीत जगत की ऐसी है’ (Kuch Reet Jagat Ki Aishi Hai) या मालिकेच्या सध्या सुरू असलेल्या कथानाकात, रतनशी कुटुंबीय एकत्र येऊन त्यांच्या घरात नंदिनीचे उत्साहात स्वागत करण्याची योजना आखतात. हेमराजने एक गुप्त ताकीद देऊन या उत्सवात व्यत्यय आणला आहे. दरम्यान, रूपा आणि हेतल, नैनीला गुपचूप घरात आणल्याबद्दल रौनकशी वादावादी करतात. त्यांनी परिस्थिती लपविण्याचा प्रयत्न करूनही नंदिनी आणि हेमराज या दोघांना काहीतरी गडबड असल्याचा सुगावा लागतो. तणाव वाढत जातो, गुपित उघडकीस येते आणि रतनशी कुटुंबातील नात्यांचा गुंता नंदिनीपुढे उलगडू लागतो.
  
या भव्य विवाह नाट्याचा एक भाग असलेल्या नंदिनीचा पेहेराव परंपरा आणि ऐश्वर्य यांचे परिपूर्ण मिश्रण दर्शवतो. नंदिनीचा ३५ किलो वजनाचा गेटअप पाहण्यासारखा आहे. त्यात बारकाईने केलेल्या भरतकामाने सुशोभित असा अप्रतिम लेहेंगा मनाला भुरळ पाडणारा आहे. त्याच्या सौंदर्यात भर घालणारा बारीक बारीक सोन्याची कलाकुसर करून सजवलेला लाल दुपट्टा, नंदिनीच्या पोषाखाला शाही रूप देतो. तिच्या वधू वेशातील प्रत्येक पैलू अगदी नाकातील नथीपासून ते उत्कृष्ट दागिन्यांपर्यंत, तिच्या शाही थाटात भर घालतो.

 
आपल्या वेडिंग लुकबद्दल बोलताना मीरा देवस्थळे म्हणते, “सामान्यतः, टेलिव्हिजनवर अभिनेत्रींना आपण लाल लेहेंगा परिधान करताना पाहतो, पण मला पानेतर परिधान करण्याची संधी मिळाली, जो गुजराती नववधू परिधान करतात. मी गुजराती असल्यामुळे, ती एक खास भावना होती. हा भव्य सिक्वेन्स शूट करण्यासाठी, २०-२५ दिवस मी हा सुंदर पेहेराव परिधान केला होता, पण लेहेंगा वजनदार होता, दागिन्यांसह त्याचे वजन ३५ किलो होते, पण सांस्कृतिक पोषाखात एक अद्वितीय सौंदर्य आहे असे मला वाटते. हा लेहेंगा परिधान करून चालणे अशक्य होते. हा एक मनोरंजक अनुभव होता. आता मला वाटतं की माझ्या लग्नाच्या वेळी मी एखादा साधासा ड्रेस घालून लग्न करीन.”