वडिलांच्या पावलावर पाऊल! डॉ. अमोल कोल्हेंची लेक ऐतिहासिक मालिकेत साकारतीये महत्त्वपूर्ण भूमिका

Amol kolhe: 'स्वराज्य सौदामिनी ताराराणी' या इन्स्टाग्राम पेजवर अलिकडेच एक व्हिडीओ शेअर करण्यात आला आहे. या व्हिडीओमध्ये अमोल कोल्हे यांची लेक दिसत असून तिने मालिकेत ताराराणी बाईसाहेबांची भूमिका साकारत असल्याचं स्पष्ट केलं आहे.

गेल्या काही दिवसांपासून सोशल मीडियावर 'स्वराज्य सौदामिनी ताराराणी' या मालिकेची जोरदार चर्चा सुरु आहे.  येत्या १५ नोव्हेंबरपासून ही मालिका प्रेक्षकांच्या भेटीला येत असून या मालिकेच्या माध्यमातून महाराणी ताराराणी यांचा जीवनप्रवास उलगडला जाणार आहे. त्यामुळे सध्या या मालिकेविषयी प्रेक्षकांमध्ये मोठी उत्सुकता निर्माण झाली आहे. त्यातच या मालिकेत महाराणी ताराराणी यांची भूमिका कोण साकारणार? हा प्रश्न अनेकांना पडला होता. मात्र, नुकताच या भूमिकेवरील पडदा दूर सारला गेला आहे. विशेष म्हणजे या मालिकेत डॉ. अमोल कोल्हे (dr amol kolhe) यांची लेक झळकणार असून ती ताराराणी यांची भूमिका साकारणार आहे.

'स्वराज्य सौदामिनी ताराराणी' या इन्स्टाग्राम पेजवर अलिकडेच एक व्हिडीओ शेअर करण्यात आला आहे. या व्हिडीओमध्ये अमोल कोल्हे यांची लेक दिसत असून तिने मालिकेत ताराराणी बाईसाहेबांची भूमिका साकारत असल्याचं स्पष्ट केलं आहे. त्यामुळे आता या मालिकेत लहानपणीच्या ताराराणींची भूमिका आद्या अमोल कोल्हे (adya kolhe ) साकारणार आहे. तर मोठेपणीच्या ताराराणींची भूमिका अभिनेत्री स्वरदा ठिगळे (swarada thigale) साकारणार आहे.

Swarajya Saudamini Tararani: ताराराणींची भूमिका साकारणार 'ही' अभिनेत्री; 400 जणींमधून झाली निवड

"नमस्कार, मी आद्या अमोल कोल्हे.  स्वराज्य सौदामिनी ताराराणी या मालिकेत लहान महाराणी ताराराणी बाईसाहेबांची भूमिका साकारत आहे. ज्या रणरागिणीने स्वराज्य राखलं, बलाढ्य मुघलांशी लढा दिला. आणि, औरंगजेबाची कबर याच मराठी मातीत खोदली ती सरसेनापती हंबीरराव मोहिते यांची कन्या आणि छत्रपती शिवाजी महाराज यांची सून म्हणजेच स्वराज्य सौदामिनी ताराराणी," असं आद्या या व्हिडीओमध्ये सांगत आहे.

View this post on Instagram

A post shared by स्वराज्य सौदामिनी ताराराणी (@swarajya_saudamini_tararani)

दरम्यान, काही दिवसांपूर्वी डॉ. अमोल कोल्हे यांनीही त्यांच्या अधिकृत इन्स्टाग्राम पेजवर मालिकेतील एक बिहाइंड द सीनचे फोटो शेअर केले होते. यात आद्या दिसून येत होती. विशेष म्हणजे यापूर्वीदेखील आद्याने ऐतिहासिक मालिकेत काम केल्याचं सांगण्यात येतं. 'स्वराज्य रक्षक संभाजी' या मालिकेत तिने महत्त्वपूर्ण भूमिका साकारली होती. त्यानंतर आता ती स्वराज सौदामिनी ताराराणी या मालिकेत झळकणार आहे.