निवेदिता सराफ आणि मंगेश कदम यांची नवीन मालिका 'आई आणि बाबा रिटायर होत आहेत!'

Aai Aani Baba Retire Hot Aahet Serial : 'आई आणि बाबा रिटायर होत आहेत!' ही मालिका २ डिसेंबरपासून प्रेक्षकांच्या भेटीला येत आहे.

स्टार प्रवाह वाहिनीवर लवकरच नवीन मालिका 'आई आणि बाबा रिटायर होत आहेत' (Aai Aani Baba Retire Hot Aahet Serial ) दाखल होत आहे. प्रत्येकाच्या आयुष्यातली अत्यंत महत्त्वाची मात्र तितकीच गृहित धरली जाणारी ही दोन हक्काची माणसं. आयुष्यभर खस्ता खाऊन आईवडील आपल्या मुलांना लहानाचं मोठं करतात. मुलं शिकून स्वत:च्या पायावर उभी रहातात, त्यांच्या संसारात रमूनही जातात. आई-वडील मात्र घरच्या जबाबदारीतून कधीही रिटायर होत नाहीत. मुलं, त्यांचं शिक्षण, त्यांची नोकरी, त्यांचं लग्न आणि नंतर नातवंडं एकामागोमाग येणाऱ्या या जबाबदारीच्या चक्रात ते नकळतपणे अडकून जातात. आई आणि बाबा रिटायर होत आहेत ही मालिका देखील अशाच एका जोडप्याभोवती फिरते ज्यांना खरेतर घरच्या जबाबदाऱ्यांमधून निवृत्त व्हायचे आहे मात्र न संपणाऱ्या जबाबदाऱ्यांमध्ये ते अडकले जातात. अभिनेत्री निवेदिता सराफ (Nivedita Saraf) आणि मंगेश कदम (Mangesh Kadam) या नव्या मालिकेतून भेटीला येणार आहेत.

निवेदिता सराफ म्हणाल्या, आमच्या वयाच्या नटांची नेहमी एक खंत असते की आता आपल्यापाशी अनुभवाची शिदोरी आहे. मात्र तरीही आई-वडिलांच्या भूमिकांमध्ये न अडकता आपल्यासाठीही मध्यवर्ती भूमिका लिहिली जावी. टीव्ही माध्यमाची मी आभारी आहे की आम्हाला मध्यवर्ती घेऊन भूमिका लिहिल्या जात आहेत. या मालिकेतलं सुधा हे पात्र मला खूपच भावले. माझ्यासोबत आता तू देखील संसारातून रिटायर हो हे नवऱ्याचं म्हणणं तिला पटतं मात्र तिचं मन मात्र हे मानायला तयार नसतं. घर-संसारात तिचा जीव अडकला आहे. प्रत्येक गृहिणीला आपलसं वाटेल असं हे पात्र आहे.

मालिकेचा विषय आपल्या खूप जवळचा आहे. रिटायरमेंट नंतर काय करायचं हे प्रत्येकाने ठरवलेलं असतं. यशवंतचं देखिल असंच एक स्वप्न आहे. कोकणातल्या घरी आपल्या पत्नीसोबत निवांत आयुष्य जगायचं असं त्याने मनाशी ठरवलेलं आहे. यशवंतप्रमाणे जवळपास प्रत्येकाचच हे स्वप्न असतं. मात्र आई-बाबा आपल्या जबाबदारीमधून कधीही रिटायर होत नाहीत. नात्यांची उत्तम गुंफण असणारी हृदयस्पर्शी कथा घेऊन येतोय याचा खूप आनंद आहे असं मंगेश कदम म्हणाले. 'आई आणि बाबा रिटायर होत आहेत!' ही मालिका २ डिसेंबरपासून दुपारी २.३० वाजता फक्त स्टार प्रवाहवर प्रेक्षकांच्या भेटीला येत आहे.