वरचा नाही वाचवणार...! सिद्धार्थबद्दल सलमान मस्करीत बोलला पण तेच खरं झालं...!

Sidharth Shukla death : ‘बिग बॉस’च्या घरातील सलमान व सिद्धार्थचा एक व्हिडीओ सध्या व्हायरल होतोय...

ठळक मुद्देसोमवारी( ६सप्टेंबर) संध्याकाळी ५ वाजता सिद्धार्थसाठी प्रार्थना सभेचं आयोजन करण्यात आलं आहे. या प्रार्थनासभेत सिद्धार्थला श्रद्धांजली वाहण्यासोबतच ब्रह्मकुमारी योगिनी दीदी यांच्या उपस्थितीत मेडिटेशन केलं जाणार आहे.

सर्वांचा आवडता ‘सिड’ अर्थात सिद्धार्थ शुक्ला (Sidharth Shukla) अचानक जगाला अलविदा म्हणत निघून गेला. त्याची एक्झिट  (Sidharth Shukla death) चटका लावणारी ठरली. अद्यापही सिद्धार्थ आपल्यात नाही, यावर अनेकांचा विश्वास बसेना. 
 सिद्धार्थ शुक्ला टेलिव्हिजन इंडस्ट्रीतलं एक मोठं नाव होतं. ‘बिग बॉस13’ (Bigg Boss 13) झकळला आणि सिद्धार्थला अपार लोकप्रियता मिळाली. केवळ आपल्या प्रसिद्धीच्या जोरावर त्यानं या शोच्या विजेतेपदावर नाव कोरलं. लोकप्रियता आणि यशाच्या शिखरावर असतानाच गत २ सप्टेंबर रोजी  त्याच्यावर काळानं झडप घातली आणि  त्याची प्राणज्योत मालवली. मुंबईत त्याच्यावर शोकाकुल वातावरणात अंत्यसंस्कार झालेत. 
 सिद्धार्थच्या अनेक आठवणी त्याचे चाहते सोशल मीडियावर सातत्याने शेअर करत आहेत. त्यातीलच त्याचा आणि सलमानचा (Salman Khan) एक व्हिडीओ सध्या व्हायरल होत आहे. ज्यात सलमान  सिद्धार्थची मस्करी करताना दिसतोय.

‘बिग बॉस 13’च्या घरात असताना सिद्धार्थ आजारी पडला होता. यावेळी रूग्णालयातूनच त्याने सलमानशी लाईव्ह संवाद साधला होता. हाच व्हिडीओ सध्या व्हायरल होतोय. व्हिडीओत सुरूवातीला सलमान आणि सिद्धार्थ जोरजोरात हसताना दिसतात. त्यानंतर सलमान म्हणतो, ‘चाहत्यांनी वाचवलं, वरचा नाही वाचवणार. सगळे रडणार, सगळे म्हणतील नाही यार खूप चांगला माणूस होता. ओरडायचा, तोंडावर बोलायचा, धक्का पण द्यायचा. पण माणूस चांगला होता.  या बिग बॉसच्या घरात कोणाला प्रेम होतं, कोणी लग्न करतं तर कोणी कायमचं निघून जातं.’ यावर, सर तुम्ही हे अगदी खरं बोललात, असं सिद्धार्थ म्हणतो.
 जणू सलमानचे ते शब्द  दुर्दैवानं खरे ठरलेत...., सोशल मीडियावर तरी याच प्रतिक्रिया उमटत आहेत.