Onkar Bhojane : “ओंकार भोजनेचा सुनील ग्रोव्हर करून टाकला...”, ‘हास्यजत्रा’ सोडताच विनोदवीर झाला ट्रोल

Maharashtrachi Hasyajatra, Onkar Bhojane : ‘महाराष्ट्राची हास्यजत्रा’ या कार्यक्रमामुळे घराघरात पोहोचलेला विनोदवीर ओंकार भोजने आता ‘फू बाई फू’ या कॉमेडी शोमध्ये दिसतोय. पण याचमुळे ओंकार गेल्या काही दिवसांपासून नेटकऱ्यांच्या निशाण्यावर आला आहे.

‘महाराष्ट्राची हास्यजत्रा’ (Maharashtrachi Hasyajatra) या कार्यक्रमामुळे घराघरात पोहोचलेला विनोदवीर ओंकार भोजने (Onkar Bhojane  ) आता ‘फू बाई फू’ (Fu Bai Fu) या कॉमेडी शोमध्ये दिसतोय. पण याचमुळे ओंकार गेल्या काही दिवसांपासून नेटकऱ्यांच्या निशाण्यावर आला आहे. ज्या शोने ओळख दिली, तो शो सोडून दुसऱ्या शोमध्ये गेल्याने सध्या नेटकरी ओंकारला ट्रोल करत आहेत.

वैयक्तिक कारण आणि सिनेमाच्या शूटींगसाठी ओंकारने ‘हास्यजत्रे’तून काही काळ ब्रेक घेतला होता. यानंतर तो हास्यजत्रेत परतणार होता. पण तो परतलाच नाही. अचानक त्याने दुसऱ्या वाहिनीवरचा ‘फू बाई फू’ स्वीकारल्याचीच बातमी आली. पाठोपाठ ‘फू बाई फू’चा प्रोमो आल्यानंतर यावर शिक्कामोर्तबही झालं. ओंकारने ‘हास्यजत्रा’ सोडून दुसऱ्या शोमध्ये जावं, हे काही जणांना आवडलं नाही. मग काय? अनेकांनी त्याला ट्रोल करायला सुरूवात केली.

 झी मराठीने नुकतंच आपल्या युट्यूबवर ‘फू बाई फू’चा एक व्हिडीओ शेअर केला आहे. या व्हिडीओत ओंकार भोजने, आशिष पवार, सागर कारंडे आणि पंढरीनाथ कांबळे हे विनोदवीर स्किट सादर करताना दिसत आहे. हा व्हिडीओ पाहिल्यानंतर  नेटकरी आणखीच बिथरले. या व्हिडीओवर तिखट कमेंट करत अनेकांनी आपला संताप व्यक्त केला.
भोजने तुझा गेम झाला भावा, अशी कमेंट एका युजरने केली.

‘ओंकार भोजने, फर्स्ट टाइम फक्त्त तुझ्यासाठी हा प्रोग्राम बघायला आले...अजिबात आवडलं नाही, तू इथे येऊन फार मोठी चूक केली आहेस,असं माझं वैयक्तिक मत आहे.  फक्त्त इथे येऊन तू तुझं करिअर बरबाद करू नकोस.. बाकी पुढे तुझं नशीब. स्वामी तुला लवकरच सुबुद्धी देवोत,अशी कमेंट करत अन्य एका युजरने आपला संताप व्यक्त केला. ‘ओंकार भोजने, प्लीज हास्यजत्रामध्ये परत जा. तुझ्यातर्फे आम्ही माफी मागतो सोनी चॅनलची. पण...पण.. ये परत महाराष्ट्राची हास्यजत्राला...,’ असं भावुक आवाहन एका युजरने केलं आहे. ‘20 टक्के वाढीसाठी 80टक्के करिअर खराब होतंय,’, असं एका युजरने म्हटलं.  विनाशकाली विपरित बुद्धी, असा टोमणाही एका चाहत्याने ओंकारला लगावला आहे.