'पोसतो ही दुनिया सारी, माझा बाप शेतकरी..', 'आई कुठे काय करते' फेम अभिनेत्रीचा शेतात काम करतानाचा व्हिडीओ चर्चेत
By ऑनलाइन लोकमत | Published: March 29, 2023 06:59 PM2023-03-29T18:59:13+5:302023-03-29T18:59:43+5:30
अभिनेत्रीचा शेतात काम करतानाचा व्हिडीओ पाहून चाहते तिच्यावर कौतुकाचा वर्षाव करत आहेत.
'पोसतो ही दुनिया सारी, माझा बाप शेतकरी..', 'आई कुठे काय करते' फेम अभिनेत्रीचा शेतात काम करतानाचा व्हिडीओ चर्चेत
Next 'आई कुठे काय करते' (aai kuthe kay karte) या मालिकेतील अनघाच्या भूमिकेतून घराघरात पोहोचलेली लोकप्रिय अभिनेत्री म्हणजे अश्विनी महांगडे (Ashvini Mahangade). ऐतिहासिक मालिकांमुळे विशेष लोकप्रिय झालेल्या अश्विनीचा या मालिकेतील नवा अंदाजही प्रेक्षकांना विशेष भावला आहे. त्यामुळे आई कुठे काय करते मधील अनघा कमी कालावधीत लोकप्रिय झाली. आज सोशल मीडियावर अश्विनीचा मोठा चाहतावर्ग असल्याचे पाहायला मिळतो. त्यामुळे या माध्यमातून ती चाहत्यांना अपडेट देत असते. यात नवनवीन फोटो, व्हिडीओ शेअर करुन ती तिच्याविषयीचे अपडेट्स देत असते. दरम्यान आता अश्विनीने सोशल मीडियावर शेतातील फोटो शेअर करत पोस्ट लिहिली आहे. तिची ही पोस्ट चर्चेत आली आहे.
अश्विनी महांगडे हिने इंस्टाग्रामवर शेतात काम करतानाचा व्हिडीओ शेअर केला आहे. तिने हा व्हिडीओ शेअर करत लिहिले की, रात दिस मेहनत करी, खाई कष्टाची भाकरी, पोसतो ही दुनिया सारी, माझा बाप शेतकरी. जगाचा पोशिंदा : बळीराजा. कोणताच राजकारणी किंवा सिस्टम शेतकर्‍याला जगवत नसते तर शेतकरीच या सर्वांना जगवत असतो आणि हेच ऊन, वारा पावसासारखे शाश्वत सत्य आहे. ईडा पिडा टळूदे आणि बळीचे राज्य येऊदे.
तिने पुढे म्हटले की, मी घातलेला शर्ट माझ्या वडीलांचा (नानांचा) आहे. नानांची मायेची ऊब, आम्हा सगळ्यांचे उन, वारा, पाऊस, आलेली संकटं यापासून कायम रक्षण केले त्याची जाणीव मनात कायम आहे. तिच्या या पोस्टला चाहत्यांची पसंती मिळते आहे. चाहते तिचे कौतुक करताना दिसते आहे.
अश्विनी महांगडेच्या वर्कफ्रंटबद्दल सांगायचे तर ती सध्या स्टार प्रवाह वाहिनीवरील आई कुठे काय करते मालिकेत पहायला मिळते आहे. या मालिकेतील तिच्या अनघाच्या भूमिकेला रसिकांची खूप पसंती मिळते आहे. ती लवकरच महाराष्ट्र शाहीर सिनेमात झळकणार आहे. अश्विनीला रुपेरी पडद्यावर पाहण्यासाठी चाहते खूप उत्सुक आहेत.