'पुढचं पाऊल' फेम अभिनेत्री जुई गडकरीचं 'ठरलं तर मग'!, काय ते जाणून घ्या

Jui Gadkari : 'पुढचं पाऊल' या मालिकेतून कल्याणीच्या रुपात अभिनेत्री जुई गडकरी घराघरात पोहोचली आहे.

स्टार प्रवाह (Star Pravah) वाहिनीवर लवकरच नवीन मालिका दाखल होते आहे. या मालिकेचं नाव आहे ‘ठरलं तर मग’ (Tharal Tar Mag). मराठी परंपरा मराठी प्रवाह हे ब्रीदवाक्य जपत स्टार प्रवाहने प्रेक्षकांना निखळ मनोरंजन देण्याचा नेहमीच प्रयत्न केला आहे. ठरलं तर मग या मालिकेतून प्रेक्षकांना आपलीशी वाटणारी नवी गोष्ट आणि नवी पात्र भेटीला येतील. खऱ्या प्रेमाची साक्ष देणारी ही मालिका असेल. स्टार प्रवाहवरील पुढचं पाऊल (Pudhacha Paul) या मालिकेतून कल्याणीच्या रुपात घराघरात पोहोचलेली अभिनेत्री जुई गडकरी ठरलं तर मग मालिकेतून सायलीच्या भूमिकेतून पुन्हा एकदा छोट्या पडद्यावर दमदार पुनरागमन करणार आहे.

ठरलं तर मग मालिकेतील भूमिकेविषयी सांगताना जुई म्हणाली, ‘ही मालिका करताना मला अतिशय आनंद होत आहे. माहेरी आल्याची भावना आहे. पुढचं पाऊल मालिकेतल्या कल्याणीवर प्रेक्षकांनी भरभरुन प्रेम केलं आहे. त्यामुळे या नव्या पात्रावरही प्रेक्षक भरभरुन प्रेम करतील याची खात्री आहे. सायली ही अतिशय समजूतदार आणि स्वतंत्र विचारांची मुलगी आहे. अनाथ असली तरी नात्यांचं महत्व जाणणारी, अन्याय सहन न करणारी मात्र प्रचंड वेंधळी. सायलीच्या वेंधळेपणामुळेच मालिकेत मजेशीर प्रसंगही पाहायला मिळतील. सर्वात महत्त्वाचं म्हणजे मालिकेची कथा ही मालिकेचं बलस्थान आहे. त्यामुळे मी स्वत:ला भाग्यवान समजतेय की इतक्या छान प्रोजक्टचा मला भाग होता आलं.’

View this post on Instagram

A post shared by Majja (@its.majja)

आदेश आणि सुचित्रा बांदेकर यांच्या सोहम प्रोडक्शन्सने या मालिकेची निर्मिती केली असून सचिन गोखले या मालिकेचं दिग्दर्शन करणार आहेत.  नवी मालिका ‘ठरलं तर मग’ ५ डिसेंबरपासून रात्री ८.३० वाजता फक्त स्टार प्रवाहवर पाहायला मिळेल.