'रंग माझा वेगळा' फेम अभिनेत्री रेश्मा शिंदे अडकणार लग्नाच्या बेडीत, केळवणाचे फोटो समोर

'रंग माझा वेगळा' फेम अभिनेत्री रेश्मा शिंदेही बोहल्यावर चढण्याच्या तयारीत आहे. रेश्माच्या घरीही लगीनघाई सुरू आहे. नुकतंच अभिनेत्रीचं केळवण पार पडलं आहे.

सध्या कलाविश्वात सेलिब्रिटींची लगीनघाई सुरू आहे. नुकतंच अभिनेता निखिल राजेशिर्केने लग्नाच्या बेडीत अडकून नव्या आयुष्याला सुरुवात केली. आता 'रंग माझा वेगळा' फेम अभिनेत्री रेश्मा शिंदेही बोहल्यावर चढण्याच्या तयारीत आहे. रेश्माच्या घरीही लगीनघाई सुरू आहे. नुकतंच अभिनेत्रीचं केळवण पार पडलं आहे. याचे फोटो समोर आले आहेत. 

रेश्मा शिंदे हा मराठी टेलिव्हिजनचा लोकप्रिय चेहरा आहे. रेश्मा विवाहबंधनात अडकून तिच्या नव्या आयुष्याला सुरुवात करणार असल्याचं समजत आहे. 'रंग माझा वेगळा' मालिकेतील कलाकारांनी रेश्माचं केळवण मोठ्या थाटामाटात पार पाडलं. याचे फोटो सोशल मीडियावर व्हायरल झाले आहेत. हर्षदा खानविलकर, ऋतुजा बागवे, शाल्मली तोळ्ये, सुयश टिळक, अनघा भगरे, आशुतोष गोखले या कलाकारांनी रेश्माचं केळवण केलं. 

रेश्माने 'लगोरी -मैत्री रिटर्न्स' या मालिकेतून टेलिव्हिजन विश्वात पदार्पण केलं होतं. त्यानंतर अनेक मालिकांमध्ये ती दिसली. काही सिनेमांमध्येही ती झळकली आहे. स्टार प्रवाह वाहिनीवरील 'रंग माझा वेगळा' या मालिकेने रेश्माला लोकप्रियता मिळवून दिली. या मालिकेत तिने दीपा ही भूमिका साकारली होती. आता सध्या ती 'घरोघरी मातीच्या चुली' या मालिकेतून प्रेक्षकांची मनं जिंकत आहे.