‘डान्स+4’च्या मंचावर रेमो डिसुझाने धर्मेशला दिली 'ही' ऑफर

‘डान्स+4’ या कार्यक्रमातील परीक्षक धर्मेश येलांडे याच्या टीममधील ‘गँग 13’ नावाच्या स्पर्धकाने सादर केलेल्या एका जबरदस्त नृत्यकामगिरीमुळे रेमो थक्क झाला.

ठळक मुद्देजबरदस्त नृत्यकामगिरीमुळे रेमो थक्क झाला

‘स्टार प्लस’वरील ‘डान्स+4’ या नृत्यविषयक रिअ‍ॅलिटी कार्यक्रमातील सुपरजज्ज रेमो डिसुझाचा ज्युनिअर आर्टिस्टपासून नृत्यदिग्दर्शक आणि बॉलीवूडचा चित्रपट निर्माता-दिग्दर्शक हा प्रवास थक्क करणारा आहे. आपल्या ध्येयावरील नजर न हलवता ते साध्य करण्यासाठी प्रचंड परिश्रम करण्याची तयारी असल्यावर हे ध्येय साध्य होतेच, याचे मूर्तिमंत उदाहरण म्हणजे रेमो डिसुझा आहे. नृत्यची मनमोकळी प्रशंसा करताना रेमो कधीच हात आखडता घेत नाही. त्याच्या या दिलदार स्वभावाचे आणखी एक उदाहरण अलीकडेच या सेटवर घडले. ‘डान्स+4’ या कार्यक्रमातील परीक्षक धर्मेश येलांडे याच्या टीममधील ‘गँग 13’ नावाच्या स्पर्धकाने सादर केलेल्या एका जबरदस्त नृत्यकामगिरीमुळे रेमो थक्क झाला. या नृत्याची संकल्पना, त्याचे दिग्दर्शन आणि केवळ एकच कॅमेरा वापरण्याची पध्दत पाहून भारावलेला रेमो आपल्या खुर्चीवरून उठून धर्मेशकडे गेला आणि त्याने हा परफॉर्मन्स अप्रतिमपणे सादर केल्याबद्दल त्याचे अभिनंदन केले. या नृत्याची संकल्पना लक्षात घेतल्यावर त्याच्या वैशिष्ट्यपूर्ण रचनेमुळे भारावलेल्या रेमोने धर्मेशला आपल्या आगामी चित्रपटातील एका गाण्यासाठी नृत्यदिग्दर्शन करण्याची ऑफर तिथल्या तिथे दिली. वरूण धवन आणि कतरिना कैफ यांच्या प्रमुख भूमिका असलेल्या या नृत्यावर आधारित चित्रपटाचे तात्पुरते नाव ‘एबीसीडी-3’ असे आहे.

रेमोने धर्मेशच्या नृत्याच्याबद्दल सांगितले, “एक चित्रपटनिर्माता या नात्याने जेव्हा तुम्ही या स्तरावरील असे अप्रतिम नृत्य पाहता, तेव्हा ते बसविणाऱ्या कलकाराबद्दलचा तुमचा आदर अनेक पटींनी वाढतो. धर्मेशने या नृत्याची संकल्पना आणि सादरीकरण यावर ज्या प्रकारे विचार केला आहे, ते अविश्वसनीय आहे. मी या मंचावर आज जे पाहिलं, त्याची तुलनाच होऊ शकत नाही. म्हणूनच मी त्याला माझ्या आगामी चित्रपटात एका गाण्याचं नृत्यदिग्दर्शन करण्याची विनंती केली.”

ज्याला आपण नृत्याचा गुरू मानले, त्या व्यक्तीकडून आपल्या कामाची इतकी प्रशंसा झाल्यावर धर्मेशला स्वर्ग दोन बोटेच उरला नसता, तरच नवल! धर्मेशने रेमोच्या पूर्वीच्या चित्रपटात एक भूमिका साकारली होती आणि आता तो त्याच्या आगामी चित्रपटात एका गाण्याचे नृत्यदिग्दर्शन करणार आहे.