रिंकू भाभी पुन्हा एकदा तुमच्या भेटीला,सुनील ग्रोव्हर पुन्हा नव्या अंदाजात दिसणार

कॉमेडीचं भन्नाट टायमिंग आणि हजरजबाबीपणा यामुळं सुनीलनं साकारलेली रिंकू भाभी रसिकांच्या मनात घर करुन गेली.

गुत्थी असो किंवा मग रिंकू भाभी… दोन्ही पात्रं छोट्या पडद्यावरील रसिकांनी डोक्यावर घेतली.या दोन्ही पात्रांनी रसिकांचं तुफान मनोरंजन केलं. विशेषतः रिंकू भाभी तर भलताच भाव खाऊन गेली. ही गुत्थी असो किंवा मग रिंकू भाभी छोट्या पडद्यावर जिवंत करणारा कलाकार म्हणजे अभिनेता सुनील ग्रोव्हर. आपलं अभिनय कौशल्य, कॉमेडीचं भन्नाट टायमिंग आणि हजरजबाबीपणा यामुळं सुनीलनं साकारलेली रिंकू भाभी रसिकांच्या मनात घर करुन गेली. पतीच्या जाचाला कंटाळलेली आणि पती आपल्यावर प्रेम करत नाही ही आपली व्यथा साऱ्या जगाला ओरडून ओरडून सांगणारी रिंकू भाभी रसिकांवर जादू करुन गेली. आता रिंकू भाभीच्या तमाम चाहत्यांसाठी एक गुडन्यूज आहे. हीच रिंकू भाभी पुन्हा कमबॅक करत आहे. 

सुनील ग्रोव्हर पुन्हा एकदा भाभीचा नवा अवतार घेऊन परत येतोय. नुकतंच सुनीलचे काही फोटो व्हायरल झाले होते. यांत त्यानं लाल आणि हिरव्या रंगाची साडी परिधान केल्याचं पाहायला मिळालं. जणू त्यानं पुन्हा रिंकू भाभीचं रुप धारण केलं. यासोबत सुनीलने एक पोस्ट शेअर केली आहे. यांना काही माहिती नाही आणि हिला काही येत नाही असं त्यानं या पोस्टमध्ये म्हटलं. याचाच अर्थ माझा पती माझ्यावर प्रेम करत नाही असं बोलणाऱ्या रिंकू भाभीचा सुनील ग्रोव्हर पार्ट २ घेऊन येत आहे. तसंच हे फोटो म्हणजे त्याच्या आगामी नव्या शोची झलकसुद्धा असू शकते अशा चर्चासुद्धा रंगल्या आहेत. 

सध्या सुनील ग्रोव्हर छोट्या पडद्यानंतर रुपेरी पडग्यावरही तितकाच बिझी आहे.विशाल भारद्वाज यांचा पटाखा आणि सलमान खानच्या आगामी भारत सिनेमाबाबत सुनील बराच उत्सुक आहे. कारण या दोन्ही सिनेमांमध्ये तो महत्त्वाची भूमिका साकारत आहे. कपिल शर्मासोबत वाद झाल्याने काही वेळ इंटस्ट्रीपासून लांब गेलेल्या सुनील ग्रोव्हरला मोठी लॉटरी लागली आहे. सुनील शर्माचे अच्छे दिन सुरु झाले, असे म्हटले जात आहे. काही दिवसांपूर्वीच विशाल भारद्वाज यांच्या 'छुरीया' सिनेमात त्याला भूमिका मिळाली होती. त्यानंतर आता त्याला अनेक बड्या निर्मात्यांकडून सिनेमाच्या ऑफर्स मिळत आहे.