'संजना आणि तिचे कपडे ह्यांची खूप...'; 'आई कुठे...' मालिका संपताना रुपाली भोसले काय म्हणाली?

'आई कुठे काय करते' मालिका लवकरच प्रेक्षकांचा निरोप घेणार आहे. त्यानिमित्ताने रुपाली भोसलेने केलेली पोस्ट चर्चेत आहे (aai kuthe kay karte)

स्टार प्रवाहवरील लोकप्रिय मालिका 'आई कुठे काय करते' आता प्रेक्षकांचा निरोप घेणार आहे. गेली ५ वर्ष ही मालिका सर्वांच्या आवडीची मालिका होती. परंतु आता मात्र ही मालिका काहीच दिवसात बंद होणार आहे. स्टार प्रवाहवरील आजवरच्या लोकप्रिय मालिकांच्या यादीत 'आई कुठे काय करते'चा समावेश झालाय असं म्हटल्यास वावगं ठरणार नाही. अशातच मालिकेत संजनाची भूमिका साकारणारी अभिनेत्री रुपाली भोसलेने मालिका संपताना एक खास पोस्ट लिहिलीय जी चर्चेत आहे.

रुपालीची पोस्ट चर्चेत

रुपाली भोसलेने सोशल मीडियावर मालिकेच्या सेटवरचे खास फोटो पोस्ट करुन लिहिलंय की, "संजना आणि तिचे कपडे ह्यांची चर्चा खूप झाली. एपिसोड पाहिला की मला dm करुन लोकांनी विचारलं ही साडी कुठून घेतली, हा कुर्ता कुठून घेतला. इव्हन ज्वेलरीच्या बाबतीतसुद्धा असाच अनुभव आहे. आणि मी ह्या सगळ्या dm ना रिप्लाय करुन त्यांना लिंक्स सुद्धा द्यायचे आणि आजही देते. आणि कमाल म्हणजे त्यांनी ते घेतल्यावर मला फोटोसुद्धा सेंड केले. खूपच भारी अनुभव आहे हा."

मालिकेतली संजनाची भूमिका झाली लोकप्रिय

रुपाली भोसलेने 'आई कुठे काय करते' मालिकेत संजनाची भूमिका साकारली. आधी संजनाची भूमिका दीपाली पानसरे ही अभिनेत्री साकारत होती. पण काही कारणास्तव दीपालीच्या जागी रुपालीची रिप्लेसमेंट झाली. रुपालीने या भूमिकेला लोकप्रियतेच्या शिखरावर नेलं. संजनाचा स्टायलिश आणि ग्लॅमरस लूक प्रेक्षकांच्या चांगलाच पसंतीस उतरला. त्यामुळे रुपाली भोसलेला सुद्धा प्रेक्षकांचं चांगलंच प्रेम मिळालं. मालिका संपल्यावर रुपालीला सर्वजण नक्कीच मिस करतील यात शंका नाही.