शिवालीसोबत काम करायला घाबरला होता युट्यूबर, नंतर म्हणाला, 'अ‍ॅटिट्यूड दाखवणाऱ्या खूप पाहिल्या...'

शिवाली परबसोबत काम करायच्या आधी युट्यूबरला रात्री झोपंही लागली नाही

महाराष्ट्राची हास्यजत्रामधील (Maharashtrachi Hasyajatra) सर्वच कलाकार आज स्टार झालेत. आपल्या विनोदी शैलीने संपूर्ण महाराष्ट्राला खळखळून हसायला त्यांनी भाग पाडलंय. त्यातलीच एक कलाकार छोटा पॅकेट बडा धमाका म्हणजेच अभिनेत्री शिवाली परब (Shivali Parab). हास्यजत्रेतील कोहली फॅमिलीची शिवाली परबही सध्या चांगलीच लोकप्रिय ठरतेय. दरम्यान शिवालीला जाहिराती, म्युझिक अल्बमसाठी ऑफर येत असतात. शिवाली लवकरच 'म्याड केलंय तू' या म्युझिक अल्बममध्ये दिसणार आहे. यातील तिच्या सहकलाकाराने शिवालीसाठी खास पोस्ट लिहिली आहे.

'म्याड केलंय तू' या म्यूझिक अल्बममध्ये शिवाली परब आणि युट्यूबर विशाल राठोड मुख्य भूमिकेत आहेत. हे गाणं सध्या सोशल मीडियावर ट्रेंडिंग आहे. शिवाली एक स्टार आहे पण तिला अॅटिट्यूड अजिबातच नाही असं म्हणत सहकलाकार विशाल राठोडने तिचं कौतुक केलं आहे. विशालने लिहिले, 'सर्वात टॅलेंटेड आणि सुंदर अभिनेत्रीबरोबर स्क्रीन शेअर करायला मिळाले हे माझं भाग्यच. महाराष्ट्राची हास्यजत्रा मधील नावाजलेली मोठी कलाकार सोबत काम करणार, आधी तर रात्रभर झोप नाही लागली की उद्या एवढ्या मोठ्या आर्टिस्टसमोर आपण कस टिकू, काय होईल? त्या कश्या वागतील?? पण सगळ्या प्रश्नांची उत्तरे तिच्या स्वभावात लगेच मिळाली, सगळ्यांना समजून घेणारी, काळजी घेणारी, प्रोजेक्ट चांगला व्हावा म्हणून आपला संपूर्ण अनुभव पणाला लावून, जीव तोडून काम करणारी कलाकार मी पाहिली! इन्स्टाग्रामवर एक रील जरी व्हायरल झाली तरी अॅटिट्यूड दाखवणाऱ्या अनेक पाहिल्या पण संपूर्ण महाराष्ट्राच्या मनावर अधिराज्य गाजवून सुद्धा जमिनीवर पाय असणारी artist मला पहायला मिळली, खूप काही शिकवून आणि mad करून गेली! Thank you Team तुम ना होते तो ये सब ना होता !'

विशालच्या या पोस्टमुळे शिवालीचे चाहते आणखी खूश झालेत. आपली शिवाली आहेच अशी म्हणत चाहतेही तिचं कौतुक करत आहेत. सध्या त्यांचं हे गाणं सोशल मीडियावर धुमाकूळ घालतंय. शिवालीने गाण्यातून सर्वांना खरोखरंच 'म्याड' केलंय.