म्हणून मी छोट्या पडद्याकडे वळले - मोनालिसा

भोजपुरी चित्रपटातील आघाडीची तारका अंतरा बिस्वास उर्फ मोनालिसा आता हिंदी टीव्ही मालिकांमध्ये पदापर्ण करणार आहे. ‘स्टार प्लस’वरील ‘नजर’ या आगामी मालिकेत ती मोहना या चेटकिणीची भूमिका साकारणार आहे.

मोनालिसा म्हणाली, “मी चित्रपटांतील एक लोकप्रिय अभिनेत्री असल्याने मी टीव्ही मालिकांमध्ये भूमिका करण्याचा कधी विचारही केला नव्हता. किंबहुना ‘नजर’ या मालिकेतील प्रमुख भूमिका मला ऑफर होईपर्यंत मला टीव्ही मालिकांमध्ये भूमिका साकारण्याची इच्छा नव्हती. मला जेव्हा या मालिकेची संकल्पना ऐकिवण्यात आली, तेव्हा मला तिची पटकथा आकर्षक वाटली आणि ती अगदीच हटके होती. मी साकारीत असलेली मोहनाची व्यक्तिरेखा वेगळी आहे. तसेच चेटकीणीचे लांब वेणी आणि तिच्याकडे असणाऱ्या विविध शक्तीमुळे मी या भूमिकेकडे ओढले गेले. मी अशा प्रकारची भूमिका कधी रंगिवलीच नव्हती आणि म्हणूनच ‘नजर’सारख्या अमानवी शक्तींवर आधारित मालिकेतून हिंदी मालिकांमध्ये पदार्पण करण्यास मी उत्सुक झाले आहे. प्रेक्षक मला या भूमिकेत कसे स्वीकरातात हे पाहण्यास मी  उत्सुक आहे.”

‘नजर’ ही अमानवी शक्तीवर आधारित मालिका असून त्याचे कथानक मुंबईसारख्या गजबजलेल्या महानगरात घडते. या शहरात राहणाऱ्या राठोड परिवाराच्या अनेक पिढ्यांवर एका चेटकीणी वाईट नजर पडलेली असते आणि त्यामुळे त्यांचे जीवन कसे संकटमय होते, त्याची ही कथा आहे.या मालिकेत स्मिता बन्सल, हर्ष राजपूत, अंकुर नय्यर, नियती फटनाणी, आशिता धवन आणि रितू सेठ यासारखे अनेक नामवंत कलाकार महत्त्वाच्या भूमिका साकारीत आहेत.