स्टारकिड्सचा मित्र 'ओरी' ची बिग बॉसमध्ये एन्ट्री; सलमाननेही विचारलं, 'तू आहेस तरी कोण?'

हा प्रोमो पाहून ओरीची खरंच बिग बॉसमध्ये एन्ट्री होतेय हे निश्चित झाले आहे.

बिग बॉस 17 सध्या चर्चेत आहे याला कारणही तसंच आहे. शोमध्ये ५ स्पर्धक वाईल्ड कार्ड एन्ट्री घेणार आहेत. त्यातलाच एक स्टार किड्सचा जवळचा मित्र ओरी (Orry) घरात प्रवेश करणार असल्याची चर्चा होती. आता यावर शिक्कामोर्तब झाला आहे. कारण शोच्या नव्या प्रोमोमध्ये ओरी ७ बॅगा घेऊन बिग बॉसच्या मंचावर आला आहे. यावेळी सलमान खान (Salman Khan) ओरीची थट्टामस्करी करताना दिसतोय. हा प्रोमो पाहून ओरीची खरंच बिग बॉसमध्ये एन्ट्री होतेय हे निश्चित झाले आहे.

सोशल मीडियावर एक व्हिडिओ व्हायरल होतोय ज्यामध्ये बिग बॉसच्या मंचावर ओरी आणि सलमान खान एकमेकांशी गप्पा मारत आहेत. ओरीने बऱ्याच सूटकेस भरुन आणलेल्या दिसत आहेत. दरम्यान सलमान ओरीची 'आय एम अ लिव्हर' या त्याच्या सध्या गाजत असलेल्या वाक्यावरुन खेचतो. सलमान म्हणतो, "तुला माहितीए ना तू या घरात वाईल्ड कार्ड एन्ट्री आहेस आम्ही लोकांना घरात सम्मानाने पाठवतो पण तुला सामानाने पाठवत आहे. आता सगळ्यांना प्रश्न पडलाय की ओरी करतो काय?' तेव्हा ओरी म्हणतो,'आता काय सांगू मी किती काम करतो मी सूर्योदयावेळी उठतो आणि सूर्यास्तापर्यंत कामच करत असतो." ओरीच्या या उत्तरावर सलमानही खळखळून हसतो. 

ओरीला पार्टी अटेंड करण्याचे पैसे मिळतात का? यावर तो म्हणतो, "पैसे तर नाही मिळत पण बरेच जण माझ्या मॅनेजरला फोन करतात. होय माझे ५ मॅनेजर आहेत." हे ऐकून सलमान खानही दंग राहतो.

सलमान आणि ओरीच्या या विनोदी संभाषणाने प्रोमो भलताच कॉमेडी झालेला दिसतोय. आता ओरीमुळे बिग बॉस सीझन 17 आणखी मजेशीर बनतोय का हे बघणं महत्वाचं असणार आहे.