सुख म्हणजे नक्की काय असतं: अनिलचं सत्य येणार समोर; गौरीला समोर मानसी देणार कबुली

Sukh mhanje nakki kay asta: सध्या सोशल मीडियावर या मालिकेचा एक प्रोमो व्हायरल होत आहे. या प्रोमोमध्ये मानसी, गौरीला सत्य परिस्थिती सांगते. गौ

छोट्या पडद्यावर गाजत असलेली लोकप्रिय मालिका म्हणजे सुख म्हणजे नक्की काय असतं(sukh mhanje nakki kay asta). ही मालिका पहिल्या भागापासून लोकप्रिय झाली आणि आता तर टीआरपीच्या शर्यतीमध्येही यशस्वी घोडदौड करत असल्याचं पाहायला मिळतं. सध्या गौरी आणि जयदीप यांच्या नात्यात अनेक चढउतार येत आहेत. सध्या गौरीला मारण्याचा प्रयत्न करण्याविषयी कोर्टात केस सुरु आहे. यामध्ये कोर्टासमोर जयदीपने आपल्याला मारण्याचा प्रयत्न केला असा जबाब ती देते. मात्र, आता गौरी समोर सत्य येणार आहे. तिला मारणारा जयदीप नसून अनिल होता हे तिला समजणार आहे.

सध्या सोशल मीडियावर या मालिकेचा एक प्रोमो व्हायरल होत आहे. या प्रोमोमध्ये मानसी, गौरीला सत्य परिस्थिती सांगते. गौरीच्या हत्येचा प्रयत्न खऱ्या जयदीपने केला नसून तो अनिल होता असं ती सांगते. पण, हे सत्य ऐकल्यावर गौरीला धक्का बसतो.

एका उंच कड्यावर गौरी आणि मानसी यांची भेट होते. यावेळी मानसी पुन्हा एकदा गौरीला मारण्याचा प्रयत्न करते. गौरीला कड्यावरुन ढकलत असताना मानसीचा तोल जातो आणि ती स्वत:च दरीत कोसळते. मात्र, गौरी वेळीच सावध होत तिचा हात धरते आणि तिला वाचवते. यावेळी गौरी, मानसीला सत्य परिस्थिती विचारते. त्यामुळे गौरीला मारणारा खरा जयदीप नसून अनिल होता असं ती सांगते.

दरम्यान, आता गौरीसमोर सत्य आल्यानंतर या मालिकेत पुढे काय होणार हे पाहणं औत्सुक्याचं ठरणार आहे. गौरी आणि जयदीपमध्ये निर्माण झालेला गैरसमज दूर होईल का? अनिलला शिक्षा मिळेल का? या प्रश्नांची उत्तरं येत्या भागात प्रेक्षकांना मिळणार आहेत.