'तारक मेहता'च्या सेटवर प्रसिद्ध अभिनेत्याला मारहाण; अभिनेत्रीने केले प्रोडक्शन हेडवर गंभीर आरोप

Taarak mehta ka ooltah chashmah: मालिकेतील काही कलाकारांनी निर्मात्यांवर गंभीर आरोप केले आहेत. त्यानंतर आता प्रोडक्शन हेड सोहेल रमानी यांच्यावरही कलाकारांनी टीकास्त्र डागण्यास सुरुवात केली आहे.

छोट्या पडद्यावर सर्वाधिक गाजलेला कार्यक्रम म्हणजे तारक मेहता का उल्टा चश्मा (taarak mehta ka ooltah chashmah). जवळपास १० ते १२ वर्ष प्रेक्षकांचं निखळ मनोरंजन करत असलेला हा कार्यक्रम सध्या एका वेगळ्याच कारणामुळे चर्चेत येत आहे. या मालिकेतील काही कलाकारांनी निर्मात्यांवर गंभीर आरोप केले आहेत. इतकंच नाही तर आता निर्मात्यांसोबतच मालिकेचे प्रोडक्शन हेड सोहेल रमानी यांच्यावरही आता कलाकारांनी टीकास्त्र डागण्यास सुरुवात केली आहे.

काही दिवसांपूर्वी मालिकेचे निर्माते असित कुमार मोदी यांच्यावर अभिनेत्री जेनिफर मिस्त्री बन्सीवाल हिने गंभीर आरोप केले होते. त्यानंतर आता मालिकेतील बावरी अर्थात अभिनेत्री मोनिका भदोरिया हिने प्रोडक्शन हेड सोहेल रमाणी याच्यावर आरोप केले आहेत. सोहेल यांनी सेटवर मालिकेतील अभिनेत्याला मारहाण केल्याचं तिने एका मुलाखतीत म्हटलं आहे.

काय म्हणाली मोनिका भदोरिया?

मोनिकाने अलिकडेच 'बॉलिवूड बबल'ला मुलाखत दिली. या मुलाखतीत सेटवर निर्माते, प्रोडक्शन हेड यांची वर्तणूक कशी असायची हे सांगितलं. मालिकेच्या सेटवर सोहेल रमानीने सगळ्याच कलाकारांना प्रचंड त्रास दिला असं तिने जाहीरपणे सांगितलं.

"एकदा सोहेलने सेटवरच्या सगळ्या खुर्च्या फेकून दिल्या होत्या. सेटवर तो प्रत्येक कलाकारासोबत उद्धटपणे वागतो. इतकंच काय तर बऱ्याच कलाकारांसोबत त्याचे वाद आहेत. विशेष म्हणजे एवढे वाद होऊनदेखील अजूनही तो प्रोडक्शन हेड याच पदावर आहे. परिणामी, मालिकेतील एक एक करत बरेच कलाकार मालिका सोडत आहेत", असं मोनिका म्हणाली.

पुढे ती म्हणते, "मी त्या अभिनेत्याचं नाव घेणार नाही. मात्र, एका त्या अभिनेत्याला सेटवर यायला उशीर झाला. तो त्याच्या आईची औषधं देण्यासाठी गेला होता. त्यामुळे त्याला सेटवर यायला उशीर झाला. तेव्हा सोहेलने प्रचंड गोंधळ माजवला होता. त्याने सेटवर आरडाओरड सुरु केली. इतकंच नाही तर त्याने पुढे मारहाणीपर्यंत हे भांडण नेलं."

दरम्यान, दिशा वकानी मालिकेत पुन्हा का येत नाही यामागचं कारणदेखील हेच असं शकतं हेदेखील तिने सांगितलं. सध्या ही मालिका पडद्यामागे सुरु असलेल्या वादविवादामुळे चर्चेत येत आहे. अनेक कलाकारांनी निर्मात्यांवर गंभीर आरोप केल्यामुळे त्याचा परिणाम मालिकेच्या टीआरपीवर होतोय का याकडे आता प्रेक्षकांचं लक्ष लागलं आहे.