प्रतिमाच्या येण्याने अखेर सत्य उलगडणार? 'ठरलं तर मग' मालिकेत नवा ट्विस्ट

मालिकेत तन्वीच्या आईची एंट्री

मराठी अभिनेत्री जुई गडकरीची (Jui Gadkari) 'ठरलं तर मग' (Tharla Tar mag) ही मालिका सध्या प्रेक्षकांमध्ये प्रचंड लोकप्रिय आहे. सायली आणि अर्जुनमधील भांडणं प्रेक्षक कायम एन्जॉय करत असतात. तर आता मालिकेत नवा ट्विस्ट येणार आहे. मालिकेत तन्वीच्या आईची एंट्री होणार आहे. ही भूमिका 'बाईपण भारी देवा' फेम अभिनेत्री शिल्पा नवलकर (Shilpa Navalkar) साकारणार आहेत. शिल्पा नवलकर या प्रतिमा ही तन्वीच्या आईची भूमिका साकारणार आहेत. त्याचा प्रोमो सध्या व्हायरल होतोय.

मायलेकीची भेट होणार?

सायलीचा लग्नानंतरचा पहिलाच श्रावणी सोमवार असल्याने तिची सासू कल्पना तिला शंकराच्या मंदिरात पूजेसाठी घेऊन जाते. याचवेळी प्रियाही तिथे आलेली असते आणि काही ना काही कट रचण्याच्या प्रयत्नात असते. सायली पूजा करत असताना प्रिया तिला मागून धक्का देते. यामुळे सायलीच्या ताटातून पूजेचं ताट खाली पडतं. यानंतर डोक्यावर ओढणी घेतलेली एक बाई सायलीच्या ताटात तांदूळ ठेवून जाते. ती महिला नक्की कोण हे बघायला सायली आणि कल्पना तिच्या मागे जातात मात्र ती निघून जाते. शेवटी ती महिला म्हणजेच प्रतिमा असल्याचं दिसतं. यावेळी शिल्पा नवलकर यांचा चेहरा समोर आला आहे. प्रतिमा परत आली तर सायली हीच तन्वी आहे आणि प्रिया खोटारडी आहे हेही सत्य सगळ्यांसमोर येईल. 

View this post on Instagram

A post shared by ठरलं तर मग..!!🌸 (@tharlatarmag_official)

मालिकेचा प्रोमो रिलीज झाल्यानंतर आता प्रेक्षकांमध्ये उत्सुकता वाढली आहे. इतके दिवस सुरु असलेला खोटारडेपणा सर्वांसमोर येणार का की गुंतागुंत आणखी वाढणार याकडे प्रेक्षकांचं लक्ष लागलं आहे.